Türkiyədəki Azərbaycan Mədəniyyət Mərkəzinin təşəbbüsü və dəstəyi ilə İğdır şəhərində yaradılmış “Bir millət, iki dövlət” Azərbaycan-Türkiyə Gənclər Teatrının səhnələşdirdiyi ilk əsər böyük Azərbaycan dramaturqu Mirzə Fətəli Axundzadənin "Hekayəti-müsyö Jordan və dərviş Məstəli şah" komediyası olacaq.

AZƏRTAC xəbər verir ki, hazırda İğdır Mədəniyyət Sarayında əsərin səhnələşdirilməsi məqsədilə məşqlər davam edir.

Qeyd edək ki, 1850-ci ildə Azərbaycan dilində yazılmış bu komediyanın əsas qayəsi savadsızlığın, cəhalətin tənqid edilməsi, elmin insan həyatını dəyişərək onu inkişaf etdirməsi, Qərb və Şərq ziddiyyətləri, satira və yumordur.

“Bir millət, iki dövlət” Azərbaycan-Türkiyə Gənclər Teatrına rəhbərliyi rejissor, Naxçıvan Dövlət Universiteti İncəsənət fakültəsinin Teatr və mədəniyyətşünaslıq üzrə baş müəllimi, Azərbaycanın Əməkdar artisti Tofiq Seyidov həyata keçirir.

Azərbaycan Mədəniyyət Mərkəzinin dəstəyi ilə yaradılan bu teatr öz repertuarında hər iki ölkənin qardaşlığı, ortaq dəyərlərimiz, tariximiz, habelə Azərbaycan və Türkiyəli müəlliflərin bu istiqamətdə əsərlərinə geniş yer verəcəkdir.

Gələcəkdə teatr milli mədəniyyətimizi təbliğ edərək Türkiyənin həm İğdır, həm də digər bölgələrində mədəni proqramlarda iştirakı nəzərdə tutulur.

Türkiyədəki Azərbaycan Mədəniyyət Mərkəzi iki ölkə arasında mədəni əlaqələrin genişləndirilməsi, milli mədəniyyətimizin təbliği, Türkiyədə “Bir millət, iki dövlət” şüarının müəllifi, Azərbaycan xalqının Ümummilli Lideri, Türk dünyasının dahi şəxsiyyəti Heydər Əliyevin Azərbaycanın dövlətçiliyi, Azərbaycan-Türkiyə əlaqələrinin qardaşlıq səviyyəsinə yüksəldilməsi, Türk dünyası arasında həmrəyliyə nail olunmasında müstəsna rolunun geniş təbliğini həyat keçirmək məqsədilə belə mədəniyyət layihələri həyata keçirir.