“NOMAD PUPPET” adlı I Beynəlxalq Kukla Teatrları Festivalı “Aktau – Türk Dünyasının Mədəniyyət Paytaxtı” layihəsi çərçivəsində sentyabrın 9-dan 14-dək Qazaxıstanın Manqistau vilayətinin Aktau şəhərində keçiriləcək.

Azərbaycan Dövlət Kukla Teatrından AZƏRTAC-a bildirilib ki, tədbir Türk Dünyası Mədəniyyət Təşkilatı (TÜRKSOY) və Qazaxıstanın Mədəniyyət və İnformasiya Nazirliyinin təşkilati dəstəyi ilə baş tutacaq.

Teatrın yaradıcı heyət üzvləri qazax teatrsevərlər və münsiflər heyəti qarşısında tarixi irsimiz, soy kökümüzlə bağlı hazırlanan “Yalquzaq” tamaşasını nümayiş etdirəcəklər.

Yazıçı-dramaturq Məhbubə Hacıyevanın “Yalquzaq və Simurq quşunun nağılı” hekayəsi əsasında hazırlanan birhissəli uşaq tamaşasının səhnələşdirəni və quruluşçu rejissoru Anaxanım Abdullayeva, quruluşçu rəssamı İqbal Əliyev, musiqi tərtibatçısı Əməkdar artist Vüqar Camalzadə, qum rəssamı Lalə Hüseynzadədir.

Tamaşada rolları Rəhim Rəhimov (Ata qurd), Ramiz Qəmbərov (Yalquzaq), Səbinə Məmmədova (Ana Qurd), Könül Nəsibova (Simurq quşu), Araz Həsənli (Baybora, Bala qurd) və Yasin Abbasov (Bala qurd) ifa edirlər.

Nümunə düşmənlər tərəfindən yandırılaraq məhv edilmiş türk qəbiləsindən təsadüfən sağ qalmış azyaşlının qurdlar tərəfindən xilas olunması və böyüdülməsi hekayəsi üzərində qurulub. Tamaşa vasitəsilə insanlarla heyvanların, ümumiyyətlə vəhşi təbiətlə cəmiyyətin təmasının müsbət hasilinə vurğu ön plana çıxır.

Yalquzağın timsalında qurdların insan övladına mərhəməti, həmçinin düşmənlərə qarşı intiqam ruhunda tərbiyəsi, güclü və ədalətli varlığa çevrilməsi də təsvir olunur.

Qeyd edək ki, festival kukla teatrı üzrə əməkdaşlığın möhkəmləndirilməsi və beynəlxalq əlaqələrin inkişafı, kukla sənətinin təbliği, teatr aləmində yeni adların kəşfi, yaradıcı təcrübə mübadiləsi, eləcə də kukla sənəti rejissor və aktyorlarının peşəkarlıq səviyyəsinin artırılması, birgə yaradıcı layihələrin həyata keçirilməsi və Qazaxıstan kukla teatrı sənətinin beynəlxalq səviyyədə tanıdılması məqsədi daşıyır.

Tanınmış teatr mütəxəssislərindən ibarət münsiflər heyəti qarşısında oynanılacaq tamaşalar Manqistau vilayətinin hakiminin xüsusi mükafatı, eləcə də Qran-Pri ilə dəyərləndiriləcəklər.

Həmçinin iştirakçılar “Ən yaxşı rejissor işi”, “Ən yaxşı aktyor ansamblı”, “Ən yaxşı aktyor”, “ Ən yaxşı aktrisa” və “Ən yaxşı kuklacı” nominasiyalarında qalib elan ediləcəklər.