Zeynalov Mir Nadir Mirəli oğlu 12 noyabr 1942-ci ildə anadan olub. O, Moskva Poliqrafiya İnstitutunun “Qrafika” fakültəsini bitirib.

Mir Nadir Zeynalov 1970-ci illərdən başlayaraq, 50 ildir ki, Azərbaycan boyakarlığında öz yerini tutan rəssamlar nəslinə daxildir. Onun dəsti-xətti həmişə tanınır, emosional, ekspressiv tabloları öz məziyyətləri ilə daim seçilir. Kollaj və instalyasiya elementləri daha çox onun rəngkarlıq kompozisiyalarının ayrılmaz hissələrinə çevrilir.

Mir Nadir Zeynalov 1976-ci ildə Moskvada keçirilən ümumittifaq sərgisində SSRİ Rəssamlıq Akademiyasının diplomunu alıb. Rəssamın 1987-ci ildə Hindistana həsr olunmuş iki fərdi sərgisi keçirilib. O, Hindistanda yaradıcılıq ezamiyyətində olaraq “Çay kənarı”, “Hind məbədi”, “Hind həyət” mənzərələrini yaradıb. “Hindistan silsiləsi”nə həmçinin bir sıra qadın portretləri “Benqal qızı”, “Vasantanın portreti”, “Müqəddəs öküz ilə qız” kimi əsərlər daxildir. 

Onun “Yaz bağı” adlı əsəri 1989-cu ildə Bakıda keçirilən Xəzəryanı Bienallidə bürünc medalla təltif olunub. Rəssamın əsərləri Moskvada, Kiyevdə, Hyustonda, Los-Anсeles və bir çox başqa ölkələrdə nümayiş edilib.

Mir Nadir Zeynalov “Xalq rəssamı” adına layiq görülüb.