Bakı Şəhər Mədəniyyət Baş İdarəsinin Əhməd Bakıxanov adına 6 nömrəli uşaq musiqi məktəbi ustad tarzən, Xalq artisti Əhməd Bakıxanovun anım günü ilə əlaqədar videoçarx yayımlayıb.

Videoçarxda deyilir: “Azərbaycanın musiqi mədəniyyəti tarixində silinməz iz qoyan elə sənətkarlar var ki, onların fəaliyyəti nəticəsində xalqımızın böyük musiqiçilər nəsli yetişib. Milli musiqimizin inkişafı yolunda cəfakeşlik göstərmiş belə görkəmli simalardan biri də məşhur pedaqoq, tarzən, Xalq artisti Əhməd Bakıxanovdur. 6 nömrəli uşaq musiqi məktəbinin adını daşıyan Əhməd Bakıxanovun bu gün anım günüdür. O,zəngin yaradıcılığı, uğurlu pedaqoji fəaliyyəti və təşkilatçılıq bacarığı ilə mədəniyyət tariximizdə özünəməxsus yer tutub.  

Əhməd Bakıxanov 1892-ci il sentyabrın 5-də Bakı şəhərində, Əmircan kəndində dünyaya göz açıb. Əmək fəaliyyətinə müəllim kimi başlayıb. Tələbələrinə sadəcə bir müəllim kim deyil, həm də bir dost kimi yanaşıb, qayğısını əsirgəməyib. Müxtəlif ansamblların, musiqi qruplarının yaradılması üçün fədakarlıq göstərib.

Əhməd Bakıxanov 1941-ci ildə Azərbaycan xalq çalğı alətləri ansamblını yaradır, kollektivin tərkibinə tar, saz, ud, qanun, qoşa nağara, qaboy və fortepianonu daxil edir. Əhməd Bakıxanov Azərbaycan xalq musiqisinin, xüsusilə də muğamların tədrisinə və təbliğinə böyük töhfələr verib. Musiqi məktəbləri üçün muğamata dair proqramlar tərtib edib. 

Musiqi folklorunun incələnməsi və nota salınmasında Ə.Bakıxanovun rolu danılmazdır. Tarzən 1973-cü ildə həyatdan köçüb, lakin onun milli musiqi qarşısında etdikləri indiyə qədər musiqiçilərin yaddaşından silinməyib.

Sənətkar “Şərəf ordeni” ilə təltif olunub, Azərbaycanın“Əməkdar müəllimi”, “Əməkdar incəsənət xadimi” və “Xalq artisti” kimi fəxri adlara layiq görülüb.”

Videoçarxı məktəbin sosial media hesabları üzərindən izləyə bilərsiniz:

https://m.facebook.com/story.php?story_fbid=315683737216339&id=100063241441014

https://www.instagram.com/tv/CbjV8p8K8Q6/?utm_medium=copy_link