Azərbaycan yazıçısı və rejissoru Cəlaləddin Qasımovun “Edam günü” tarixi-detektiv romanı işıq üzü görüb. Bu barədə Trend Life-a müəllif xəbər verib.

“Əsərdə mənim polisdə 18 illik iş təcrübəm öz əksini tapıb, həmçinin sovet dövründə Bayıl həbsxanasında yatmış keçmiş məhbusların və işçilərin xatirələrindən istifadə edilib. Ona görə də əsərin əsasını gerçək hadisələr təşkil edir. Psixoloji triller SSRİ-nin son illərində baş verən hadisələrdən danışır, əsərin qəhrəmanlarının obrazları ziddiyyətlər kontekstində açılır. “Kitabda 12 hekayət var, onlardan birini mən 2016-2018-ci illərdə “Edam günü” adı altında ekranlaşdırmışam. Bu film ABŞ, İspaniya, Böyük Britaniya, Yaponiya və digər ölkələrdə keçirilən 35 kino festivalında müxtəlif nominasiyalarda beynəlxalq mükafatlar qazanıb", - Cəlaləddin Qasımov qeyd edib.

“Edam günü” filmində kamerada məhbus həyatının həyəcan doğuran anları nümayiş olunur. Müəllif həbsxana mövzusunu iki bir-birinə əks qütbdə yerləşən ziddiyyətlər işığında açır. Film “SPP Production” şirkətinin istehsalıdır. Quruluşçu-rejissor, ssenari müəllifi və baş prodüser Cəlaləddin Qasımov, quruluşçu operator Mehdi Yaqubovdur, rollarda Azərbaycan Respublikasının Əməkdar artistləri Rövşən Kərimduxt, Sabir Məmmədov, aktyorlardan Məmməd Əliyev, Nazil Ağalarov, Ramin Şıxəliyev, Soltan Qasımov, Hikmət Məmmədov, Vüqar Qurbanov və başqaları çəkiliblər.

Cəlaləddin Qasımov 1967-cı ildə Tovuz şəhərində anadan olub. Hərbi xidməti SSRİ-nin Almaniyada dislokasiya olunmuş xüsusi qoşunları sıralarında keçib. Moskva İdarəçilik İnstitutunda, Bakı Dövlət Universitetində, Ukrayna Beynəlxalq Hüquq Akademiyasında və Azərbaycan Respublikası DİN-nin Polis Akademiyasında təhsil alıb. 1997-ci ildən polis orqanlarında çalışıb, Xətai rayonu Polis İdarəsinə rəhbərlik edib. AVMVİB-nin sədr müavini, “İdmançılar narkotiklərlə mübarizədə” İB-nin rəhbəridir. Bir sıra tarixi roman və povestlərin, dəfələrlə beynəlxalq kino festivallarda mükafatlara layiq görülmüş “Nobel qardaşlarının birinci uğuru”, “Şöllerin arxivi”, “Edam günü”, “Hacı Zeynalabidin Tağıyevin şərəfli ömrünün 100 ili”, “Stalinin qaranlıq keçmişi” bədii və sənədli filmlərinin müəllifidir.

(Müəllif: Vüqar İmanov)