Biz şəxsi mənafelərimiz və kommersiya məqsədi üçün yox, Azərbaycanı dünyada tanıtmaq üçün filmlər çəkirik və istəyimizə də nail oluruq. Bu, təkcə bizim deyil, eyni zamanda, Azərbaycanın uğurudur. Düşünürəm ki, hər bir yaradıcı insan ölkəmizin təbliği işinə qismən də olsa öz töhfəsini verməlidir. Filmlərin çəkilişlərini heç bir maddi dəstək olmadan öz hesabımıza aparmışıq. Çəkdiyimiz filmlər son iki ildə beynəlxalq festivallarda 155 mükafat alıb.

Bu fikirləri AZƏRTAC-a müsahibəsində “Şollerin arxivi” bədii filminin ssenari müəllifi, quruluşçu rejissoru və baş prodüseri Cəlaləddin Qasımov deyib.

Ölkə başçısının almanların Azərbaycana gəlişinin 200 illiyi münasibətilə imzaladığı müvafiq Sərəncama uyğun olaraq, “Şollerin arxivi” filmini çəkdiklərini söyləyən rejissor deyib ki, bu film Alman-Azərbaycan dostluğundan, Azərbaycanın multikultural dəyərlərindən bəhs edir: “Dünya mediasında, jurnallarda, saytlarda filmimiz barədə çoxsaylı yazılar yayımlandı. Dünya distribüterləri tərəfindən filmlərimiz “iPitch.tv”, “Vimeo”, “Amazon” platformasına yerləşdirildi. Dünyada böyük marağa səbəb olan “Şollerin arxivi” bədii filmi Azərbaycan kino tarixində beynəlxalq festivallarda ən çox uğur əldə edən ekran əsərlərindəndir. “Şollerin arxivi” filmindən sonra dünyanın bir çox ölkələrindən festival təşkilatçıları filmlərimiz üçün bizə müraciət etdi”.

Daha sonra “Stalinin qaranlıq keçmişi”, “Nobel qardaşlarının ilk uğuru”, “100 illik şərəfli ömür” sənədli filmlərini istehsal etdiklərini söyləyən Cəlaləddin Qasımov bu ekran əsərlərinin də Avropada uğur qazandığını söyləyib.

“Bu filmlərlə Azərbaycan mədəniyyətini dünyaya tanıtmaq işinə gücümüz daxilində töhfələr verməyə çalışdıq. ABŞ Nümayəndələr Palatasının sponsorluğu ilə keçirilən festivalda qalib olduq, müvafiq jurnalda filmin adı qaliblər sırasında yer aldı. Konqresmen Cimmi Qomes tərəfindən imzalanmış diploma layiq görüldük” - deyə, Cəlaləddin Qasımov vurğulayıb.

O, ötən ilin dekabr ayında uğur qazandığı bir sıra beynəlxalq kino festivalların adlarını da çəkib: “Nobel qardaşlarının ilk uğuru” sənədli filmi Hindistanın “Lake City Internatıonal Fılm Festıval” tərəfindən “Ən yaxşı rejissor”, “Stalinin qaranlıq keçmişi” sənədli filmi isə “Ən yaxşı sənədli film” kateqoriyaları üzrə qalib sertifikatları ilə mükafatlandırıldı. “Stalinin qaranlıq keçmişi” və “Nobel qardaşlarının ilk uğuru” ekran əsərləri minlərlə film arasından seçilərək Argentinanın “BUEIFF CHANNEL” festivalına daxil olunub və ölkəmizi təmsil edib. Film BUEIFF tədbirinin HCD Teatrında (Buenos Aires, Argentina) nümayiş olunacaq. Bundan əlavə “Şollerin arxivi” filmi Almaniyanın “Cinema of Nations”, “Edam günü” filmi Türkiyənin “Nartugan Film Festivali”nın seçilmişlər siyahısına daxil olub. Hindistanın “5th Internatıonal Folklore Fılm Festıval 2022@Indıa” festivalına “Stalinin qaranlıq keçmişi” filmi seçilib. İngiltərənin “Filmmakers United İnternational Film Festival”ında “Edam günü” filmi seçilmişlər siyahısına daxil edilib və sertifikatla təmin olunub. “Şollerin arxivi” filmi isə festivalda “Fəxri Ad” qazanıb və sertifikat əldə edib”.