İyulun 6-da Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin 4 nömrəli filialı Cəfər Cabbarlının ev-muzeyi ilə birgə “Şuşa ili” çərçivəsində tədbir keçirib.

Əvvəlcə torpaqlarımızın ərazi bütövlüyü uğrunda canlarını qurban verən şəhidlərimizin xatirəsi bir dəqiqəlik sükutla yad edilib. Daha sonra filial müdiri Aynur Babayeva Prezident İlham Əliyevin müvafiq Sərəncamı ilə 2022-ci ilin Azərbaycanda “Şuşa İli” elan edilməsini diqqətə çatdırıb.

Kitabxananın nəzdində fəaliyyət göstərən Səməd Vurğun Poeziya Ocağının rəhbəri Zərəngiz Mansurova Azərbaycan torpaqları işğaldan azad edildikdən sonra Qarabağ bölgəsində, eyni zamanda, Şuşada ciddi quruculuq işlərinin görüldüyü, bununla yanaşı, mədəniyyət paytaxtının artıq beynəlxalq tədbirlərə ev sahibliyi etdiyi bildirib. Kitabxanaçılar İradə Hüseynova, Esmira Zülfüqarova Şuşanın, Qarabağın şair qızı, son hökmüdarı Xurşidbanu Natəvanın qəzəllərindən nümunələr səsləndiriblər.

Cəfər Cabbarlının ev-muzeyinin direktoru Qəmər Seyfəddinqızı Şuşanın görkəmli incəsənət xadimlərindən, şəhərin 1992-ci ildə Ermənistan tərəfindən işğal olunmasından, uzun illər işğal altında saxlanılmasından, işğal müddətində Azərbaycanın tarixi abidələrinin erməni vandalları tərəfindən dağıdılmasından bəhs edib. Cəlil Məmmədquluzadənin Ev-muzeyinin direktoru Yeganə Məmmədova, Nəriman Nərimanovun xatirə muzeyinin kiçik elmi işçisi, əslən Şuşadan olan İradə Əliyeva, Prezident İdarəçilik Akademiyasının tələbəsi, ictimai fəal Murad Həsənxanlı və başqaları bu gün Şuşanın öz sahiblərinə qayıtdığını, dünyanın ən gözəl turistik mərkəzlərindən birinə çevriləcəyini, qədim Azərbaycan tarixinin bu Qələbə Günü ilə şərəfləndiyini söyləyiblər.

Sonda Prezident İdarəçilik Akademiyasının tələbələri-Beynəlxalq müsabiqə laureatı Səid Quliyev və bədii qiraətçi Çinarə Quliyevanın ifasında kitabxananın əməkdaşı, şair-publisist Zərəngiz Dəmirçi Qayalının yaradıcılığından seçilmiş nümunələr əsasında “Xan qızı Xurşidbanu Natəvan-190” adlı ədəbi-bədii kompozisiya təqdim olunub.