Avqustun 17–20-də Macarıstanın paytaxtı Budapeştdə ənənəvi olaraq təşkil edilən 39-cu Beynəlxalq Xalq Yaradıcılığı Festivalı (Mesterségek Ünnepe) keçirilir.

AZƏRTAC xəbər verir ki, tədbir hər il olduğu kimi, bu dəfə də Buda qalasının ərazisində, xüsusilə Tancsics Mihaly küçəsi, Szemtharonsag meydanı və parkında Margareta Terrasında, Tos Arpad xiyabanında təşkil edilib. Bu, Macarıstanın ən böyük mədəniyyət bayramlarından biridir. Həmçinin bu günlərdə macarlar ölkənin Milli Günü — Müqəddəs İştvan (İstván) gününü qeyd etməyə hazırlaşırlar. Avqustun 20-nə təsadüf edən bu bayram vaxtı Macarıstan çoxlu sayda turist qarşılayır.

Bu il festivalın fəxri qonağı Azərbaycandır.

Ölkəmiz festivalda üç stendlə təmsil olunur. Burada Azərbaycan xalq sənətinin müxtəlif nümunələri təqdim edilir:

∙ Azərbaycan xalçaçılıq sənəti

∙ Vəloqçuluq (yun, keçə sənəti)

∙ Tikmə və nadir naxış sənəti — təkəlduz (yalnız sol əllə işlənən xüsusi toxuma texnikası)

∙ Kəlağayı sənəti (ipək baş örtüyü)

∙ Xətəmkarlıq (mikro mozaika ilə birlikdə)

Festivalda dünyanın müxtəlif ölkələrindən təxminən 800-dən çox sənətkar iştirak edir. Hər il olduğu kimi, bu dəfə də tədbirə 100 mindən artıq ziyarətçinin gələcəyi gözlənilir. Festival boyu ustad dərsləri, canlı sənət nümunələrinin nümayişi, milli musiqi və rəqs proqramları keçiriləcək.

Bu iştirak Azərbaycanla Macarıstan arasında mədəni əlaqələrin möhkəmlənməsinə xidmət edir və xalqlarımızın zəngin irsini beynəlxalq miqyasda tanıtmaq baxımından mühüm əhəmiyyət daşıyır.

Vüqar Seyidov

AZƏRTAC-ın xüsusi müxbiri

Budapeşt