Borçalı aşıq mühitinin yetirməsi, XX əsr Azərbaycan aşıq sənətinin görkəmli simalarından olan Aşıq Kamandar (Kamandar Həmid oğlu Əfəndiyev) 1932-ci il oktyabrın 21-də Borçalıda anadan olub. XX əsrin ikinci yarısından bənzərsiz ifası və dastan söyləmək bacarığı ilə Azərbaycan aşıq sənətində özünəməxsus yer tutub, təkcə Gürcüstanda və Azərbaycanda deyil, eyni zamanda Türkiyə, İran və Orta Asiyada da məşhur olub. Təsadüfi deyil ki, bu gün Borçalı ilə yanaşı, Azərbaycanda, xüsusilə də Təbriz və onun ətraf bölgələrində sənətə gələn gənclərin çoxu Aşıq Kamandar yolunu davam etdirir.

Aşıq Kamandar 1959-cu ildə Moskvada keçirilən Azərbaycan mədəniyyəti ongünlüyünün mükafatçısı olan, 1963 və 1984-cü illərdə Azərbaycan aşıqlarının III və IV qurultaylarında iştirak edib, “Əməkdar mədəniyyət işçisi” (1984) fəxri adına layiq görülüb. 1987- ci ildə Tbilisidə keçirilən beynəlxalq Xalq yaradıcılıq festivalında ən mahir musiqiçi kimi laureatı olub.

Tanınmış sənətkar 72 saz havasını böyük ustalıqla ifa edib. Ustad aşıq bir neçə saz havasının yaradıcısıdır: “Fəxri”, “Qaragöz balam”, “Doğma Gürcüstanım” və s.

Onun ifasında 34 dastan audio, video kasetlərə yazılıb sənətsevərlərə çatdırılıb. Aşıq Kamandarın Azərbaycan və Gürcüstan teleradio şirkətlərinin qızıl fondunda çoxlu lent yazıları saxlanılır. Ustadın anadan olmasının 60 və 65 illik yubileyləri Gürcüstanda və Azərbaycanda hökumət səviyyəsində qeyd olunub.

Aşıq Kamandar 2000-ci il oktyabrın 26-da uzun sürən xəstəlikdən sonra vəfat edib.