Qulu Qasım oğlu Xəlilov 1930- cu il noyabr ayının 20-də Ermənistan SSR-nin Sisyan rayonunun Qızılcuq kəndində anadan olub. 1948-ci ildə ailəsi oradan məcburən Ağcabədi rayonunun Poladlı kəndinə köçürülüb.

1954-cü ildə Azərbaycan Dövlət Universitetinin (indiki BDU) jurnalistika fakültəsini bitirib, “Ədəbiyyat və incəsənət” qəzetində işə başlayıb.

1959-cu ildə namizədlik dissertasiyasını, 1967-ci ildə doktorluq dissertasiyasını müdafiə edib. Bir müddət Azərbaycan SSR EA-nın Nizami adına Ədəbiyyat İnstitutunda çalışan Qulu Xəlilov 1968-ci ildən ADU-nun professoru kimi pedaqoji fəaliyyətini davam etdirib. Q.Xəlilovun 30-a qədər kitabı çap olunub. Əgər bura müxtəlif mövzular üzrə müəllifin yazdığı 1500-dən çox elmi, bədii, publisistik məqaləni də əlavə etsək, onun necə zəngin yaradıcılığa malik olduğunu təsəvvür etmək çətin olmaz.

Onun ədəbiyyatımızın müxtəlif mövzularına dair yazdığı 20-dən çox elmi-monoqrafik tədqiqat əsəri, yüzlərlə sanballı, kəsərli məqalələri geniş ictimaiyyət tərəfindən həmişə rəğbətlə qarşılanıb.

XX əsr Azərbaycan ədəbiyyatında, xüsusilə onun sovet dövründə yazıb-yaradanlarından elə bir ciddi, görkəmli sənətkar tapmaq olmaz ki, Q.Xəlilov onun haqqında sözünü deməmiş olsun. “Rəsul Rza” (1960), “Böyük sənət uğrunda” (1962), “Vaqif” pyesi və tarixi dram janrı” (1964), “Sənət və sənətkar” (1966), “Azərbaycan romanının inkişaf tarixindən” (1973), “Həyat yaradıcılıq çeşməsidir” (1974), “Həyat və idrak” (1980), “Tənqidçilik çətin peşədir” (1986) və s. kitablarında o, Azərbaycan poeziyasının və nəsrinin, dramaturgiyasının görkəmli nümayəndələri barədə ciddi fikirlər, mühakimələr söyləyib.

Onun “Yaşamaq istəyirəm”, “Qocaların söhbəti”, “Qulun yaman kişnədi”, “Müəllimə”, “Hörümçək”, “Tənha palıd”, “Bir də gəlmə”, “Ömrün baharı”, “Atam və mən” kimi romanları, “Yaylaqda”, “Qocaların söhbəti”, “Umusuq” və s. bədii əsərləri vardır.

1953-cü ildə Azərbaycan Yazıçılar Birliyinə üzv qəbul edilib.

Əsərləri keçmiş SSRİ xalqlarının dillərinə tərcümə olunub.

Professor Q.Xəlilov 1993-cü ildə “Əməkdar elm xadimi” fəxri adına layiq görülüb.

Qulu Xəlilov 1995-ci il noyabr ayının 18-də Bakıda vəfat edib, Mərdəkanda Şağan qəsəbəsindəki qəbiristanlıqda dəfn edilib.

2013-cü ildə haqqında “Yaşamaq istiyirəm” adlı film çəkilib.