Rasim Ocaqov 1933-cü il noyabrın 22-də Şəkidə anadan olub. Moskvada Ümumittifaq Dövlət Kinematoqrafiya İnstitutunun kinooperatorluq fakültəsində, Azərbaycan Dövlət Teatr İnstitutunda rejissorluq fakültəsində təhsil alıb. “Azərbaycanfilm” kinostudiyasında çalışıb.

“Əsl dost”, “Bizim küçə”, “Mən rəqs edəcəyəm”, “Sən niyə susursan?” və “Skripkanın sərgüzəşti” filmlərini lentə alıb. Rejissor kimi ilk işi yarımçıq qalmış “Gəncəbasarlı qisasçı” filmini tamamlamaq olub. Bundan sonra “Tütək səsi” , “Ad günü”, “Bağlı qapı”, “Özgə ömür”, “Park”, “Ölsəm bağışla”, “Həm ziyarət, həm ticarət” və “İstintaq” kimi filmlər çəkib. Onun çəkdiyi sənət nümunələri Azərbaycan kinematoqrafiyasının qızıl fonduna daxildir.

Rasim Ocaqov “Xalq artisti” fəxri adına, “Şöhrət” ordeninə layiq görülüb, Dövlət mükafatı laureatı olub. Azərbaycan kino sənətinin görkəmli nümayəndəsi 2006-cı ildə vəfat edib.