Xəzər rayon MKS-nin 1 saylı filialında "Sevimli yazarlarla tanışlıq " başlıqlı sərgi təşkil olunub |
 |
| |
İyunun 30-da Bakı Şəhər Mədəniyyət Baş İdarəsinin Xəzər rayon MKS-nin 1 saylı filialında "Sevimli yazarlarla tanışlıq " başlıqlı sərgi təşkil olunub. Bu sərgidə Mərdəkan qəsəbəsinin sakini və oxucularımızın sevimli yazıçısı olan Fəhad Əsgərovun kitabları sərgilənib.
Əsgərov Fərhad Ramiz oğlu 1960-cı il dekabr ayının 24-də Bakının Mərdəkan qəsəbəsində anadan olub. Mərdəkandakı 181 saylı tam orta məktəbi bitirib. M.Ə.Sabir adına Bakı Pedaqoji Texnikumunun məzunudur, ixtisasca texniki əmək və rəsmxət müəllimidir. Sonralar jurnalistika ixtisası üzrə də ali təhsil alıb. 1980-82-ci illərdə Qazaxıstan respublikasında həqiqi hərbi xidmətdə olub. İlk əmək fəaliyyətinə Kəlbəcər rayonunun Kilsəli kənd orta məktəbində müəllim kimi başlayıb. Əsgəri xidmətdən sonra Kəlbəcər rayonunun Seyidlər kənd orta məktəbində işləyib. Sonralar müxtəlif illərdə Bakının bir neçə məktəbində müəllim işləyib və hal-hazırda da pedaqoji sahədə çalışır.
Fərhad Əsgərov 1983-cü ildən başlayaraq indiyədək həm də mətbuat sahəsində çalışır. Keçmiş ittifaqın dövründə onun müxtəlif sahələrlə bağlı informasiya və məqalələri “Azərbaycan müəllimi”, “Azərbaycan gəncləri”, “İdman”, “Bakı”, “Vışka”, “Bakinskiy raboçiy”, “Molodyoj Azerbaydjana” qəzetlərində, eləcə də “Mədəni maarif işi”, “Təşviqatçı” jurnallarında dərc edilib. Respublika radiosunda xeyli yazıları səsləndirilib.
Respublikamızın müstəqilliyi illərində isə müxtəlif səpkili yazıları “Səhər”, “Açıq söz”, “7 gün +”, “Sərbəst düşüncə”, “Yurddaş”, “Yeni dünya”, “Azərbaycan dünyası”, “Karvan yolu”, “İnsan hüquqları”, “El qəzeti”, “Hakimiyyət”, “Yeni təfəkkür”, “Paklıq”, “Nəbz” qəzetlərində işıq üzü görüb. O, bir qəzetdə çalışsa da, adları çəkilən qəzetlərlə əməkdaşlıq edib. 2005-ci ildə “Nüanslar” ictimai-siyasi publisistik qəzetini təsis edib. Elə o vaxtdan “Nüanslar” qəzetinin təsisçisi və baş redaktorudur.
Fərhad Əsgərov ədəbi yaradıcılığa hələ gənclik illərindən başlayıb. O, alleqorik janrda nağıl və poemalar, sənədli povestlər, monoloq, novella, olmuş hadisələr, gənclər, eləcə də kiçik yaşlı məktəblilər üçün hekayələr yazmışdır. O, həmçinin 50-dən çox oçerkin müəllifidir. Onun müxtəlif illərdə “Tale”, “Ötən günlər”, “Yurd həsrəti, Vətən sevgisi”, “Ya iskal Lyudmilu”, “Neslomlennıy repressiyami”, “Filin dərdi böyükdü”, “Ömür elə qısadır ki...”, “Prokuror-ümid qapısı”, “El ağsaqqalı”, “Ürəklərdən gələn səs”, “Qaranlıq meşədə gizli oyunlar”, “Əsl dost”, ”Seçilmiş əsərləri”, “Ömürdə izlər”, “Qara qızıl fatehi”, “Tyomnıye iqrı v tyomnom lesu” adlı kitabları işıq üzü görmüşdür. 2014-cü ildə onun 288 səhifəlik “İllərin nəfəsi” adlı kitabı çapdan çıxmışdır. Kitabda yazıçının müxtəlif illərdə yazdığı hekayələr, olmuş hadisələr, alleqorik nağıl və poemalar, oçerklərdən nümunələr, monoloq, novella toplanmışdır. Kitabda həmçinin yazıçı-jurnalistin müxtəlif qəzetlərdə dərc edilmiş məqalələrindən nümunələr də verilmişdir. Oxucuların ixtiyarına verilmiş bu kitabdakı əsərlər oxucuları düzlüyə, ədalətliliyə, işdə məsuliyyətli olmağa və digər insani keyfiyyətlərə səsləyir.
Fərhad Əsgərov 1997-ci ildən Azərbaycan Jurnalistlər Birliyinin, 2002-ci ildən Azərbaycan Yazıçılar Birliyinin üzvüdür. “Qızıl qələm” və “İti qələm” mükafatları laureatıdır.
Bir qız övladı var.
baku-art.az
|
|
|
Oxunma sayı : 140 | 3-07-2018, 16:22 | |
|
|
