R.Axundov adına Buzovna Mədəniyyət evində “Dərs” filmi məktəblilərə təqdim edilib

Mayın 28-də Bakı Şəhər Mədəniyyət Baş İdarəsinin Ruhulla Axundov adına Buzovna Mədəniyyət evində “Dərs” bədii filminin nümayişi olub.

Rafiq Əliyev və Cavid Təvəkkülün rejissorları olduğu film məktəb, şagird və ailə münasibətlərindən bəhs edir. Film 2015-ci ildə Azərbaycan Respublikası Mədəniyyət Nazirliyinin dəstəyi ilə Cəfər Cabbarlı adına "Azərbaycanfilm" kinostudiyasında çəkilib. Ekran əsəri uşaqların şəxsi və ictimai həyatı, cəmiyyətdə davranışı, yeniyetmələrin üzləşdiyi problemləri əks etdirməklə yanaşı, çətinliklərdən çıxış yollarını araşdırır. Nəticəyə gətirən səbəbləri içdən nümayiş etdirir.

Filmdə əsas rolları Tamerlan Ağayev, Aliyə Əliyeva, Rəşid Əliyev, Ayna Zərbəliyeva, Camal İbrahimov və Kamal İbrahimov ifa ediblər.

Filmin sonunda müəllim və şagirdlər arasında mövzu ilə bağlı diskussiya keçirilib.