Aydın Ələsgər oğlu Kazımzadə (Kazımov) 1940-cı il yanvar ayının 15-də Bakı şəhərində anadan olub. Bakıdakı 44 nömrəli orta məktəbdə oxuyub, 1958-ci ildə isə 57 nömrəli axşam fəhlə-gənclər məktəbini bitirib. 1955-1958-ci illərdə istehsalatda işləyib. 1958-1963-cü illərdə Azərbaycan Dövlət Universitetinin (indiki BDU) jurnalistika fakültəsində təhsil alıb.

1963-cü ildən kinematoqrafiya sahəsində çalışıb. 1985-ci ildə Moskvada ÜDKİ nəzdində reklam işi üzrə yaradıcı və rəhbər kinematoqrafiya işçilərinin ixtisasartırma kurslarını bitirib.

Azərbaycanda kino mətbuatının yaradıcısı olub, “Kino” qəzetinin və “Film” jurnalının baş redaktoru, Azərbaycan SSR Dövlət Kinematoqrafiya Komitəsi Məlumat-reklam bürosunun direktoru, Az.TV-də dublyaj şöbəsinin müdiri, “Azərbaycantelefilm” YB-də böyük redaktor, Azərbaycan Kino Muzeyinin müdiri, “Azərkinovideo” İB-də reklam şöbəsinin müdiri, Azərbaycan Kino Ensiklopediyasının baş redaktor müavini, icraçı direktoru, Dövlət Filmfondunun direktor müavini, baş mütəxəssisi vəzifələrində çalışıb.

1997-2015-ci illərdə Azərbaycan Dövlət Mədəniyyət və İncəsənət Universitetində Azərbaycan Kino tarixi fənnindən dərs deyib, dosentdir.

Redaktoru olduğu “Kino” qəzeti 1974-cü ildə kinematoqrafiya sahəsində dərc edilən mətbuat orqanlarının ümumittifaq müsabiqəsinin qalibi olub və SSRİ Kinematoqrafiya Komitəsinin diplomu ilə mükafatlandırılıb.

1963-cü ildən dövri mətbuatda Azərbaycan kino tarixinə, kino sənətinin müxtəlif problemlərinə dair 200-dən artıq elmi və publisistik məqalələri çap olunub. Yerli televiziya kanallarında “Kino tariximizdən” və “Kinoman” verilişlərinin aparıcısı olub. Hazırda “Mədəniyyət” kanalında “Kinosalnamə” verilişinin aparıcısı və ssenari müəllifidir.

Milli kino tariximizin 1916-cı ildən deyil, məhz 1898-ci ildən başlanması faktının üzə çıxarılıb sübuta yetirilməsi və ümummilli lider Heydər Əliyev tərəfindən Sərəncamla avqustun 2-ni Kino İşçiləri Günü elan etməsi Aydın Kazımzadənin adı ilə bağlıdır.

Azərbaycanda animasiya kinosunun yaranma tarixinin 1933- cü ilə aid olması faktının üzə çıxarılıb sübuta yetirilməsi də məhz Aydın Kazımzadənin adı ilə bağlıdır.

“Azərbaycan filmlərinin izahlı kataloqu”, “Bizim Azərbaycanfilm”, “Azərbaycan kinosu və müharibə”, “Heydər Əliyev və kinematoqraf”, “Azərbaycan kinematoqrafçıları”, “Əbədi ölməzlik zirvəsi”, “Üzeyir Hacıbəyov və kino”, “Rasim Ocaqov” və s. kitabların müəllifidir.

2000-ci ildə “Qızıl qələm”, 2001-ci ildə “Humay”, 2003-cü ildə “Qızıl çıraq”, 2007-ci ildə “Rəsul Rza adına”, 2008-ci ildə “Həsən bəy Zərdabi”, 2010-cu ildə “Yusif Məmmədəliyev”, 2010-cu ildə “Cəfər Cabbarlı”, 2011- ci ildə “Zirvə” mükafatları iləl təltif olunub.

2000-ci ildə “Əməkdar mədəniyyət işçisi”, 2005-ci ildə isə “Əməkdar incəsənət xadimi” fəxri adlarına layiq görülüb.

Aydın Kazımzadə 2012-ci ildən Prezident təqaüdçüsüdür.