Görkəmli Azərbaycan yazıçısı Maqsud İbrahimbəyovun kitabları Azərbaycan və ingilis dillərində nəşr edilib. Bu barədə Trend Life-a Maqsud İbrahimbəyov Yaradıcılığı Mərkəzinin direktoru Anna İbrahimbəyova məlumat verib.

“Qardaşımdan yaxşısı yox idi” povesti Maqsud İbrahimbəyov yaradıcılığında məxsusi yer tutan əsərlərdəndir. Bu əsərdə təmənnasız qardaş məhəbbəti ilə yanaşı, qadağan olunmuş ehtiras, insanın ən gizli arzularrı, təkrarolunmaz ab-havası olan köhnə Bakı öz əksini tapıb. Kitab Maqsud İbrahimbəyov Yaradıcılığı Mərkəzi tərəfindən “İçərişəhər” Tarix-Memarlıq Qoruğu Dövlət İdarəsi ilə birlikdə Azərbaycan, rus və ingilis dillərində yenidən nəşr olunub. Kitabın üz qabığını gənc rəssam Orxan Qarayev çox nəfis şəkildə tərtib edib. Kitaba həmçinin “Cəhənnəmdə səərinlik rüzgarı” povesti – çoxlarına bəlkə də tanış olmayan, yazıçının son yazıların biri daxil edilib.

Maqsud İbrahimbəyov yaradıcılığı pərəstişkarlarına tanış olmayan “Qara geyimli qadın gəlmişdi...” povesti də oxuculara təqdim edilib. Əsər yazıçının sonuncu povestidir və o dünyasını dəyişəndən sonra işıq üzü görüb. Oxucunu Bakının yaxınlığında kiçik balıqçı qəsəbəsinə aparaq, duzlu Xəzər havasını ciyərlərinə çəkməyə imkan verən, balıqçılarla birlikdə dənizə çıxaran və onlardan biri ilə yaxından tanış olmağa imkan verən bu povest rəssam Rəşad Mehdiyevi ilhama gətirərək yeni rəsm əsərinin yaranmasına səbəb olub. Sonradan bu əsər kitabın üz qabığına çevrilib və TEAS Press nəşriyyat evi tərəfindən 3 dildə - Azərbaycan, rus və ingilis dillərində nəşr olunub.

TEAS Press tərəfindən üç dildə - Azərbaycan, rus və ingilis dillərində nəşr olunan “Uşaqlığın son gecəsi” kitabında “Uşaqlığın son gecəsi”, “Bizim Cəbiş müəllim”, “Bayquş uçub gəldi”, “Qoy o bizimlə qalsın” kimi ekran həyatı yaşayan əsərləri, həmçinin “Püstə ağacı”, “Əlvida, Miledi” və başqa tədris proqramına daxil edilmiş hekayələri yer alıb.

Kitabları Azərbaycanın bütün kitab mağazalarında əldə etmək olar.

Maqsud İbrahimbəyov (11 may 1935 - 22 mart 2016) – yazıçı, kinodramaturq və kinorejissordur. Azərbaycanın Xalq yazıçısı, Azərbaycan SSR-nin Dövlət mükafatı laureatıdır, “İstiqlal”, “Şərəf” və “Şöhrət” dövlət ordenləri ilə təltif edilib, onun yaradıcılığı “Dostluq”, “Qırmızı əmək bayrağı”, Roma Papasının və s. ordenlərinə layiq görülüb. Yazıçı Milli Məclisin deputatı, Luiziana ştatı Universitetinin Elmi Şurasının Fəxri üzvü, Azərbaycan Əsilzadələr Cəmiyyətinin sədri idi. O, 22 marrt 2016-cı ildə vəfat ediv, I Fəxri Xiyabanda dəfn olunub. Maqsud İbrahimov dünyanın müxtəlif dövri nəşrlərində çap olunmuş romanların, povestlərin və hekayələrin müəllifidir. Onun əsərləri dünyanın bir çox dillərinə tərcümə edilib. Onun ssenariləri əsasında 18 bədii və 7 sənədli film çəkilib. Onların arasında milli kinematoqrafiyanın qızıl fonduna daxil olmuş “Bizim Cəbiş müəllim”, “Uşaqlığın son gecəsi”, “Yarımçıq qalmış serenada”, “Bir gözəl gün”, “Əsas müsahibə”, “Truskavetsə kim gedəcək?” və başqalarını göstərmək olar. Yazıçının əsərlərinin əksəriyyəti teatrların repertuarını bəzəyir.

(Müəllif: Vüqar İmanov)