Oqtay Seyid Hüseyn oğlu Sadıqzadə 1921-ci il fevral ayının 21(24)-də Xızıda, yazıçı Seyid Hüseynin və şairə Ümgülsümün ailəsində anadan olub. 1935-1939-cu illərdə Bakı Rəssamlıq Texnikumunda təhsil alıb, ilk əsərləri ilə sənətşünasların diqqətini cəlb edib. 1941-ci ildə repressiyaya məruz qalmış ailənin nümayəndəsi kimi sürgün olunub, lakin düşdüyü ağır şəraitə baxmayaraq, yaradıcılığını davam etdirib.

1946-cı ildə Bakıya qayıtdıqdan sonra kitab qrafikası ilə məşğul olmağa başlayıb və nəzərə çarpacaq uğurlar qazanıb. Təhsilini davam etdirmək üçün Surikov adına Moskva Dövlət Rəssamlıq İnstitutuna daxil olub, 1956-cı ildə oranı qrafika ixtisası üzrə bitirib.

Bakıda “Azərnəşr”də bədii redaktor kimi əmək fəaliyyətinə başlayan rəssam çalışdığı ilk illərdən Azərbaycan və dünya ədəbiyyatının görkəmli nümayəndələrinin əsərlərinə illüstrasiyalar çəkib. Rəssam 1940-50-ci illərdə İ.S.Turgenevin “Atalar və oğullar”, O.Balzakın “Qorio ata”, M.Qorkinin “Artamonovların işi”, İ.Qasımov və H.Seyidbəylinin “Uzaq sahillərdə” (1954), V.Hüqonun “Səfillər” (1955-1963), C.Məmmədquluzadənin “Danabaş kəndinin əhvalatları” (1958-1959), Xaqaninin “Lirika” (1958), Nizaminin “Fitnə” (1966), R.Nuri Güntəkinin “Çalıquşu” (1963) və başqa əsərlərə maraqlı kitab illüstrasiyaları yaradıb.

Fırça ustasının qrafika və rəngkarlıq əsərləri hazırda R.Mustafayev adına Milli Azərbaycan Dövlət İncəsənət, Nizami adına Milli Ədəbiyyat, Milli Azərbaycan Tarixi, C.Cabbarlı adına Teatr, eləcə də Üzeyir Hacıbəylinin, Səməd Vurğunun, Bülbülün, Hüseyn Cavidin ev-muzeylərində, həmçinin, Dövlət Şəkil Qalereyasında və Almaniya, ABŞ, Kanada, İsrail, Belorus və Pakistanda şəxsi kolleksiyalarda saxlanılır.

Azərbaycanda müasir rəssamlıq məktəbinin təşəkkülü və inkişafında onun böyük xidmətləri olub. Pedaqoji sahədə səmərəli fəaliyyət göstərməklə o, özünün zəngin bilik və təcrübəsini gənc rəssamlar nəslinin yetişdirilməsi işinə həsr edib.

Oqtay Sadıqzadənin Azərbaycan təsviri sənətinin inkişafındakı xidmətləri dövlət tərəfindən yüksək qiymətləndirilib, fəxri fərmanlar və mükafatlarla qeyd olunub. O, 1977-ci ildə Azərbaycanın “Əməkdar incəsənət xadimi”, 1992-ci ildə isə “Xalq rəssamı” fəxri adlarına layiq görülmüşdür. 1999-cu ildə müstəqil respublikamızın ali mükafatları olan “Şərəf”, 2011-ci ildə “Şöhrət” ordenləri ilə, 2014-cü ildə təsviri sənətin inkişafında xidmətlərinə görə Azərbaycan Respublikasının Dövlət mükafatı ilə təltif olunub.

Oqtay Sadıqzadə 2014-cü il dekabr ayının 20-də Bakı şəhərində vəfat edib.