Əyyub Müseyib oğlu Hüseynov 1916-cı il sentyabr ayının 2-də Naxçıvan MR-nin Şərur rayonunun Xok kəndində anadan olub.

Əyyub Hüseynovun yaradıcılığının erkən dövrü onun Bakı Rəssamlıq Texnikumunda təhsil aldığı illərdən başlanır. O, 1931-ci ildə texnikuma daxil olub, buranı bitirdikdən sonra təhsilini Tbilisi Rəssamlıq Akademiyasında davam etdirib. Təhsilini başa vurduqdan sonra bir müddət Naxçıvan Dövlət Dram Teatrında quruluşçu rəssam işləyən Əyyub Hüseynov müxtəlif tamaşalar üçün dekorasiya və eskizlər hazırlayırdı. Lakin rəssam kimi dəzgah rəngkarlığına daha çox meyl edib.

Əyyub Hüseynov zəhmət və kənd mövzularında rəngarəng tablolar yaradıb, yaradıcılığının bütün dövrlərində mənzərə, portret, məişət janrlarına müraciət etmiş, özünəməxsus bədii xüsusiyyətləri, geniş rəng yaxmaları ilə seçilən üslub nümayiş etdirib.

Zaman etibarilə Əyyub Hüseynovun yaradıcılığını üç dövrə bölmək olar: sənət fəaliyyətinə başladığı erkən (30- 50-ci illər), yaradıcılığının məhsuldar mərhələsi olan inkişaf (60-80-ci illər) və bədii sənətkarlıq baxımından cilalanmış yetkin dövrü (80-90-cı illər). Bu dövrlərin hər birinin özünəməxsus cəhətləri, sənət dünyagörüşü, bədii üslub xüsusiyyətləri olub.

Yağlı boya ilə çoxlu sayda mənzərə, məişət-tematik və digər mövzularda əsərlər yaradan rəssamın yaradıcılığında milli-tarixi tematika mühüm yer tutur. Daha çox mənzərəçi, portretçi rəssam kimi tanınsa da, tablolarında bu tematika olduqca ifadəli, təsirli məzmuna, dərin məna yükünə, ciddi ideya-bədii tutuma malikdir.

1948-1998-ci ildə pedaqoji fəaliyyətə başlayıb, 1956-1965-ci illərdə Əzim Əzimzadə adına Azərbaycan Dövlət Rəssamlıq məktəbinin (indiki ADRA) direktoru işləyib. Ömrünün 50 ilini bu gün adları, yaradıcılıqları ilə şöhrət qazanan neçə-neçə fırça ustalarının əhatəli bilgi qazanmalarına sərf edib.

Əyyub Hüseynovun əsərlərində torpaq, səma, təbiət təsvirləri üstünlük təşkil edir. “Araz vadisində” mənzərə tablosunun yaranmasından 70 ildən artıq vaxt keçməsinə baxmayaraq, bu gün də məşhurdur. Əyyub Hüseynov sovet dövründə əsərləri ilə Azərbaycanı dünyada tanıtdıranlardan biri olub. Müxtəlif janrlarda çəkdiyi rəsmlərində milli dəyərlərimizi təsvir edib. Yaratdığı tablolar bu gün də dünya muzeylərini bəzəyən eksponatlardandır.

Əmək mövzusunda çəkdiyi “Kömək gəlib”, “Yaylaqda”, “Çobanlar”, mənzərə janrında “Şahbuz”, “Yağışdan sonra”, “Aşıq Ələsgər”, “Əmək qəhrəmanı” portretləri məşhurdur.

1980-ci ildə “Əməkdar incəsənət xadimi” fəxri adına layiq görülüb.

Əyyub Hüseynov 1998-ci il aprel ayının 17-də Bakı şəhərində vəfat edib.