Azərbaycanın Milli Qəhrəmanı Aqil Quliyev 19 sentyabr 1963-cü ildə Qərbi Azərbaycanın Sisyan rayonunun Urud kəndində doğulub. 1980-ci ildə tam orta məktəbi bitirib, Azərbaycan Neft Akademiyasının axşam şöbəsinə daxil olub. Üçüncü kursda oxuyanda hərbi xidmətə çağırılıb. Əsgəri xidmətini başa vurduqdan sonra yarımçıq qalmış təhsilini davam etdirmək fikrindən daşınıb. Çünki onun marağı artıq başqa bir sahəyə yönəlib. O, 1982-ci ildə Xarkov Ali Milis Məktəbinə daxil olub. 1986-cı ildə həmin məktəbi fərqlənmə diplomu ilə bitirərək orada müəllimlik etməyə başlayıb. İki il sonra Aqilin həyatında ən üzüntülü günlər başlayıb.

1988-ci ildə Dağlıq Qarabağda baş verən hadisələr, digər tərəfdən isə valideynlərinin erməni şovinistləri tərəfindən doğma yurdlarından vəhşicəsinə qovulması onu bərk narahat edib. O, nigarançılığa son qoymaq üçün ailəsini də götürüb Bakıya gəlib. Ailəsinə müvəqqəti sığınacaq tapıb və sonra təzəcə yaranmaqda olan Milli Ordunun qərargahına gələrək cəbhəyə göndərilməsini xahiş edib. Bu müraciətdən sonra onu 45 nəfər döyüşçü ilə birlikdə Ağdam bölgəsinə göndəriblər. Leytenant A.Quliyev rota komandiri təyin edilib. Vətən müdafiəçiləri sırasında onun kiçik qardaşı Nəsimi də var idi. Nəsimi isə kəşfiyyat qrupuna başçılıq edib. Bölük Ağdama çatanda Xocalı artıq düşmən mühasirəsindəydi. Aqil vaxt itirmədən öz dəstəsilə ilə Xocalıya yollanıb. Əhali dəstənin gəlişini səbirsizliklə gözləyirdi. Güman ediblər ki, dəstə onları mühasirədən qurtaracaq. Lakin döyüşçülərin sayca az olması və silah-sursatın çatışmaması mühasirəni yarmağa imkan verməyib. 366-cı motoatıcı alay Xocalıya doğru irəliləyib. Aqil Quliyev dinc əhalinin müdafiəsini təşkil etmək üçün var gücü ilə çalışıb.

1992-ci ilin fevral ayı… Artıq Xocalı mühasirədə idi. Erməni yaraqlıları 366-cı alayın köməyinə arxalanaraq insanları vəhşicəsinə qırırdılar. Aqil öz rotası ilə düşmənə bir neçə dəfə sarsıdıcı zərbə endirib. 1992-ci il fevralın 18-dən 25-nə qədər davam edən döyüşlərdə rota komandiri böyük rəşadətlə döyüşüb, onlarla erməni faşistini məhv edib. O, bu döyüşlərin birində – “Qaz kontoru” deyilən yerdə hər iki ayağından yaralanıb.

Fevralın 25-i… Bu tarix qanla yazılan səhifələrimizdəndir. Döyüş dostları onu təhlükəsiz yerə aparmağa cəhd göstəriblər. Lakin amansız ölüm onları haqlayır. Kətik kəndi yaxınlığında güllələrdən biri onun ürəyinə sancılır. Onun cəsədini faciədən 5 gün sonra hadisə yerindən götürmək mümkün olur. Ailəli idi. Bir qızı yadigar qalıb.

Azərbaycan Respublikası Prezidentinin 7 iyun 1992-ci il tarixli 833 saylı fərmanı ilə Quliyev Aqil Sahib oğluna ölümündən sonra “Azərbaycanın Milli Qəhrəmanı” adı verilib.

Bakı şəhərində Şəhidlər Xiyabanında dəfn edilib.

Bakının Bayıl qəsəbəsindəki küçələrdən biri onun adını daşıyır. Yaşadığı binanın önündə xatirə lövhəsi vurulub.