Nəsiman Qara oğlu Yaqublu 1962- ci il fevral ayının 22-də Zəngilan rayonunun Zəngilan kəndində anadan olub. Zəngilan rayonunda orta təhsilini başa vurduqdan sonra Bakı Dövlət Universitetinin Jurnalistika fakültəsinə daxil olub. 1983-cü ildə təhsilini davam etdirmək üçün Rusiyaya gedib, Sankt-Peterburq Universitetinin Jurnalistika fakültəsində oxuyub. 1986-cı ildə Sankt-Peterburq Universitetini bitirdikdən sonra Bakıya qayıdıb, 1986-1992-ci illərdə “Yazıçı” nəşriyyatında redaktor, 1992-1993-cü illərdə “Azərbaycan ordusu” qəzetində baş redaktor işləyib, 1993-cü ildən Bakı Dövlət Universitetində çalışır.

2001-ci ildə “Azərbaycan Milli İstiqlal mübarizəsi və Məhəmməd Əmin Rəsulzadə” mövzusunda namizədlik dissertasiyasını, 2014-cü ildə “Azərbaycan milli istiqlal mücadiləsi və mühacirət mətbuatı” mövzusunda doktorluq dissertasiyasını müdafiə edib.

“Ağrılı ömürlər”, “Xocalı qırğını”, “Məhəmməd Əmin Rəsulzadə”, “Azərbaycan Milli İstiqlal mübarizəsi və Məhəmməd Əmin Rəsulzadə”, “Azərbaycan legionerləri”, “Azərbaycan-Polşa əlaqələrində Məhəmməd Əmin Rəsulzadənin rolu”, “Əbdürrəhman Fətəlibəyli Düdənginski”, “Türkiyənin azərbaycanlılara müstəqillik mücadiləsində dəstəyi (Sovetlər dönəmi: 1920-1991- ci illər)”, “Azərbaycanda yaşayan milli azlıqların nəşrləri”, “Bakının Qurtuluşu”, “Kaspi” qəzetinin yaranması və fəaliyyəti”, “Məhəmməd Əmin Rəsulzadə ensiklopediyası”, “Qafqaz İslam Ordusunun Azərbaycanda izləri”, “Məhəmməd Əmin Rəsulzadə ensiklopediyası” (Türkiyə türkcəsində), “Cümhuriyyət qurucuları”, “Azərbaycan Milli Azadlıq Hərəkatı Ensiklopediyası” kitablarının müəllifidir.

2008-ci ildə Türkiyənin Ankara şəhərində Azərbaycan Xalq Cümhuriyyətinin yaradılmasının 90 illiyinə həsr edilən beynəlxalq konfransda, 2009-cu ildə Polşanın Varşava şəhərində Qafqaz mühacirlərindən Piradzeyə həsr edilən konfransda, 2015-ci ilin

oktyabr ayının 26-29-da Polşanın Varşava Universitetinin Şərqi Avropanı Öyrənmə Mərkəzinin təşkil etdiyi Beynəlxalq Prometey konfransında iştirak edib.

Azərbaycan Yazıçılar Birliyinin və Azərbaycan Jurnalistlər Birliyinin üzvüdür.

Tarixi və publisistik yazıları Azərbaycanda, Türkiyədə və Polşada çap edilib.

Hacı Zeynalabdin Tağıyev adına Milli Mükafatın və Həsən bəy Zərdabi Mükafatının laueratıdır.

N.Yaqublu Azərbaycan Respublikası Prezidentinin 2019- cu il 27 may tarixli 1205 saylı sərəncamı ilə “Azərbaycan Xalq Cümhuriyyətinin 100 illiyi (1918-1920)” yubiley medalı ilə təltif edilib.