Zahid Bayram oğlu Əliyev 23 mart 1963-cü ildə Qərbi Azərbaycanın Vedibasar mahalının Vedi rayonunun Şidli kəndində anadan olub, orta məktəbi elə həmin rayonda bitirib. 1980-ci ildə hərbi xidmətə çağrılıb. 1982-ci ildə hərbi xidməti başa vurub. 1988-ci noyabr-dekabr aylarında Ermənistandan, öz dədə-baba yurdlarından qovulanlar arasında Zahid və onun ailəsi də vardı. Ailəsi ilə birgə Suraxanı rayonunda yerləşib.

70 il Sovet imperiyasi tərkibində yaşayan Azərbaycan xalqı əsarət altında yaşamaqdan bezib azadlığa can atırdı. Azadlıq istəyən xalq dircəliş hərəkatına başlamışdı. Bakıdakı hərəkatın iştirakçılarından biri də Zahid idi. Hər gün işdən çıxıb hərəkat iştirakçılarının yanına gedər, onlara ərzaq aparardı. 19 Yanvarda belə günlərdən biri idi. Olacaqlardan xəbərsiz axşam vaxtı işdən çıxaraq hərəkat iştirakçılarının yanına getdi.

Sovet hakimiyyəti azadlıq istəyən xalqı susdurmaq və cəzalandırmaq məqsədi ilə XI Qızıl ordunu Bakıya göndərdi. Əliyalın xalq top atəşinə tutuldu. İşğalçı rus əsgərlərinin tarixi cinayətinin günahsız qurbanı olaraq şəhidlik zirvəsinə ucaldı. Şəhidlər Xiyabanında dəfn olunub.