Ramiz Fərzulla oğlu Zöhrabov 1939-cu il mayın 2-də Bakı şəhərində anadan olub. 1947-1958-ci illərdə Azərbaycan Dövlət Konservatoriyası nəzdindəki orta ixtisas musiqi məktəbində təhsil alıb və 1958-1960-cı illərdə Konservatoriyanın ifaçılıq fakültəsinin simli alətlər şöbəsində oxuyub, 1965-ci ildə isə Konservatoriyanı musiqişünaslıq ixtisası üzrə bitirib.

Əmək fəaliyyətinə 1965-ci ildə Gəncə şəhərindəki Q.Hüseynli adına orta ixtisas musiqi məktəbində musiqi tarixi və nəzəriyyəsi üzrə müəllim kimi başlayan Ramiz Zöhrabov 1966-1968-ci illərdə Müslüm Maqomayev adına Azərbaycan Dövlət Filarmoniyasında xalq musiqisi üzrə redaktor vəzifəsində işləyib. O, 1968-1969-cu illərdə Bakı şəhər 16 saylı musiqi məktəbində musiqi nəzəriyyəsindən dərslər aparıb, 1969-cu ildən etibarən indiki Ü.Hacıbəyli adına Bakı Musiqi Akademiyasında Azərbaycan xalq musiqisinin tarixi və nəzəriyyəsi kafedrasında çalışıb. 1990-cı ildə Azərbaycan Bəstəkarlar İttifaqının İdarə Heyətinin katibi seçilən Ramiz Zöhrabov 2012-ci ilədək həmin vəzifədə çalışmış, ölkəmizdə musiqişünaslığın inkişafına dəyərli töhfələr verib. 1974-cü ildə sənətşünaslıq namizədi, 1994-cü ildə sənətşünaslıq doktoru elmi dərəcəsini, 1992-ci ildə professor elmi adını alıb. 

Ramiz Zöhrabov şifahi ənənəli Azərbaycan professional musiqi janrlarının nəzəri problemlərinə, Azərbaycan bəstəkarlarının yaradıcılığına dair 20 kitabın, 350 elmi-publisistik məqalənin, bir sıra müxtəlif musiqi əsərlərinin müəllifidir. Bunlardan 1983-cü ildə Moskvada, 1991- ci ildə Təbrizdə nəşr edilən “Azərbaycan təsnifləri” kitabını, “Azərbaycan zərbimuğamları” (1986), “Muğam” (1991), “Bəstəkarlarımızın portreti” (Bakı, 1997) kitablarını misal göstərmək olar. Bundan başqa, 1999-cu ildə Tehranda nəşr edilmiş “Azərbaycan modal musiqisi” kitabı, 2000-ci ildə Bakıda çap edilmiş “Cahargah muğamının nəzəri əsasları” kitabı da Azərbaycan musiqişünaslıq elminin tədqiqində xüsusi yer tutur. “Azərbaycan musiqi ədəbiyyatı”, “Musiqi ədəbiyyatı”, “Şifahi ənənəli Azərbaycan professional musiqisi” adlı dərsliklərin də müəllifidir. R.Zöhrabovun xalq çalğı orkestri üçün “Bayram lövhələri”, “Uşaq səhnələri”, “Ərdəbil lövhələri suitaları, instrumental pyesləri Dövlət Teleradio Verilişləri Şirkətinin fonduna daxil edilib, müxtəlif məzmunlu mahnıları məşhur müğənnilər, uşaq xoru və solistlər tərəfindən ifa olunub. 1971-ci ildən televiziyada silsilə verilişlərin müəllifi və aparıcısı olub. Azərbaycan musiqi mədəniyyətinin zənginləşdirilməsi sahəsində çoxillik səmərəli fəaliyyəti yüksək qiymətləndirilib, 1990-cı ildə Azərbaycan Respublikasının “Əməkdar incəsənət xadimi” fəxri adını, 1997-ci ildə “Humay” mükafatını alıb. 2008-ci ildə “Xalq artisti” fəxri adına layiq görülüb, 2009-cu ildə isə müstəqil Azərbaycan Respublikasının ali mükafatlarından olan “Şöhrət” ordeni ilə təltif edilib. 

Professor Ramiz Zöhrabov 2017-ci il aprel ayının 23-də vəfat edib.