Nəriman Abbasqulu oğlu Əzimov 1936-cı il iyun ayının 1-də Gəncədə anadan olub. Azərbaycan Dövlət Konservatoriyasının xor dirijorluğu fakültəsini bitirib.

Ömrünün 60 ili Azərbaycan Televiziyası və Radiosu ilə bağlı olub. Yüzlərlə mahnı və musiqi əsərlərinin müəllifi olan sənətkar, Azərbaycan musiqi mədəniyyətinin inkişafında və dünyada tanıdılmasında əvəzsiz xidmətlər göstərib.

Tələbəlik dövründən Xalq çalğı alətləri orkestrində tarzən kimi fəaliyyətə başlayıb.

1955-ci ildə Azərbaycan Dövlət Konservatoriyasının dirijorluq fakültəsinə daxil olub. AzTR-nin Xor kollektivində xormeyster işləyib, 1974-cü ildən Səid Rüstəmov adına Azərbaycan Dövlət Xalq Çalğı Alətləri Orkestrinin bədii rəhbəri və baş dirijoru olub. AzTV QSC səs rejissoru işləyib.

N.Əzimov tar və xalq çalğı alətləri orkestri üçün musiqilərin, eləcə də “Xatirə”, “Qaynana əməliyyatı Q”, “Özəlim – gözəlim” əsərlərinin müəllifi olub.

1982-ci ildə Azərbaycan SSR Ali Sovetinin Fəxri fərmanını alıb, 1991-ci ildə Azərbaycanın “Xalq artisti” fəxri adına layiq görülüb. 2003-cü ildə isə professor elmi rütbəsini qazanıb. Azərbaycan Respublikası Prezidentinin 2016-cı il 7 noyabr tarixli Sərəncamına əsasən “Şöhrət” ordeni ilə təltif edilib.

Nəriman Əzimov 2016-cı il noyabr ayının 19-da vəfat edib, Gəncənin Səbsikar qəbiristanlığında dəfn edilib.