Lənkəran şəhərinin mərkəz hissəsində yerləşən Böyük Bazar məscidi XIX əsrdə inşa olunub. Tikilinin təşəbbüskarları və baniləri Böyük Bazarda tanınan ziyalı şəxsiyyətlərdən olan Kərbəlayi Qulu, Kərbəlayi Ağaqulu, Hacı Mirağa və Böyük Bazar camaatı olub.

Bu məscidin 1929-cu ilədək altı böyük təkyəsi olub. Həmin təkyələrə onu inşa edən şəxslərin adları verilib. Çox təəssüf ki, Kərbəlayi Hüseynin, general Hacı Mirabbas xan Talışinskinin, Kərimovların, Hacı Manafın və Hacı Ələsgərin təkyələri otuzuncu illərdə öz görkəmini itirib və dağıdılıb. Yalnız Hacıağa Əkbərovun təkyəsi bu günə kimi qorunub saxlanılıb.

Məscid fəaliyyətə başlayan ilk gündən ona molla Mirəhməd axund, Şeyx Hüseyn axund, molla Ağabala axund, molla Vəli axund, Mirzə Məmmədhüseyn axund başçılıq edib.

Məscidin inşasında qiymətli meşə məmulatlarından istifadə edilib. Məscidin hörgü işləri bişmiş kərpicdəndir, üstü isə kirəmitlə örtülüb. Məscidin içərisində əsas yeri camaatın namaz qılması üçün geniş zal tutur. Sovet hakimiyyəti dövründə Böyük Bazar məscidindən anbar, kitabxana, şəkil qalereyası kimi istifadə olunub. Ancaq bütün bunlara baxmayaraq məscid ilkin görünüşünü saxlayıb və hətta ona bəzi əlavələr də olunub.

Məscid əsas və yardımçı binalardan ibarətdir. Sovet dövründə dağıdılan minarəsi 1995-ci ildə yenidən bərpa edilib. Minarənin hündürlüyü 36 metrdir. Məsciddə kanalizasiya və istilik sistemləri mövcuddur. Burada hətta ibadət edənlərin təhlükəsizliyini təmin etmək üçün təhlükəsizlik kameraları quraşdırılıb.

Məsciddə Dövlət Komitəsindən qeydiyyatdan keçən dini icma fəaliyyət göstərir. Ölkə əhəmiyyətli tarixi abidə kimi Mədəniyyət Nazirliyi tərəfindən qorunur. 

Məscidin girəcəyində mərmər lövhədə kiril əlifbası ilə "Məscidi 1864-cü ildə Hacı Mirağa Mirtağızadə Lənkəranlı tikdirmişdir"  yazısı vardır. Bir minarəsi var.