Görkəmli kamança ifaçısı, Azərbaycan Respublikasının Xalq artisti Şəfiqə Alxas qızı Eyvazova  9 mart 1947-ci ildə Bakıda anadan olub. 

Şəfiqə Eyvazova 1971-ci ildə Azərbaycan Dövlət Konservatoriyasını bitirib. 1963-76-cı illərdə Azərbaycan Teleradio Verilişləri Komitəsinin xalq çalğı alətləri orkestri və Ə. Dadaşovun rəhbərlik etdiyi ansamblın (hazırda Ə. Dadaşov adına) solisti olub.

1965-ci ildən solo konsertlərlə çıxış edən sənətkarın repertuarına “Rast”, “Cahargah”, “Rahab”, “Şur”, “Şüştər” və s. muğamlar, Azərbaycanın və xarici ölkə bəstəkarlarının əsərləri daxildir. SSRİ xalqlarının folklor musiqisi festivalında (1978, Bişkek; 1979, Moskva), musiqişünasların Beynəlxalq simpoziumunda (1987, Səmərqənd), eləcə də UNESCO xətti ilə ABŞ-da keçirilən "Şərq xalqlarının musiqi folkloru" festivalında (1988, Alim Qasımov və Ramiz Quliyevlə birgə) iştirak edib.

1974-cü ildən Azərbaycan Dövlət Konservatoriyasında (indiki Bakı Musiqi Akademiyası) dərs deyir. Şəfiqə Eyvazova bir çox xarici ölkələrdə (ABŞ, İsveçrə, Almaniya, Fransa, Polşa, Belçika, İtaliya, Əfqanıstan və s.) qastrolda olub.