Elçin Qəzənfər oğlu Həmidov 1958-ci ilin 29 iyun tarixində Bakıda anadan olub. Körpə yaşlarından əvvəlcə atasını, sonra isə anasını itirən Elçini və bacı-qardaşlarını əmisi himayəyə götürüb. Amma gələcəyin istedadlı aktyorunu hələ qarşıda daha böyük çətinliklər gözləyir. Əmisinin evində də əziyyətli günlər keçirən, valideynlərinin itkisindən özünə gəlməyə macal tapmayan Elçinin əvvəlcə bacısı, sonra isə qardaşları vəfat edir.

Elçin Həmidov 1974-cü ildə Azərbaycan Dövlət Musiqili Komediya Teatrında xor artisti vəzifəsində çalışıb. 1977-ci ildə İncəsənət İnstitutunun Dram-kino aktyoru fakültəsinə daxil olub, 1981-ci ildə oranı bitirib.

1983-cü ildən Azərbaycan Dövlət Musiqili Komediya Teatrında artist-vokalist kimi fəaliyyət göstərib. “Boşanaq, evlənərik”də İkram, “Qızıl gül”də Azay, “Beş manatlıq gəlin”də Nadir, “Subaylarınızdan görəsiniz”də Mayıl, “Səhnədə məhəbbət”də ofisiant, “Talelər qovuşanda”da Totuş, “Ər və arvad” Kəblə Qubad və digər rolları ilə tamaşaçıların rəğbətini qazana bilib.

Elçin Həmidov əsl bariton və soprano səsə malik idi. Tamaşalardakı çox musiqiləri ifa edib və tamaşalara xüsusi ahəngdarlıq və gözəllik qatıb. O, hər bir rolu ilə tamaşaçıya gülüş, sevinc bəxş etməyə çalışıb. Bunun üçün Elçin Həmidova epizodik olsa belə, səhnədə, televiziya ekranında görünmək kifayət edib. Tanınmış sənətçiləri parodiya etməyi isə başqa bir aləm idi. O, gülərüz simaya, əla bədən quruluşuna malik idi, onda qadın və kişi rolları çox koloritli alınıb. Bu mənada Elçin bənzərsiz aktyor idi. Onun parodiyalarını uşaqdan böyüyə hər kəs çox sevərək izləyib.

İstedadlı aktyor həmçinin "Planet Parni iz Baku" ŞHK teatrının əsas simalarından biri idi. O, bu teatrda gözəl obrazlar yaradıb. O cümlədən “Məhəllə 1” və “Məhəllə 2” filmlərində canlandırdığı Məzi obrazı komik olmaqla bərabər, həm də düşündürücüdür. Bundan başqa Elçin Həmidov televiziya verilişlərində də aparıcılıq edib. Onun "Tezbazar", eləcə də mətbəx verilişləri tamaşaçılar tərəfindən maraqla qarşılanıb.

Onun son yaratdığı obraz Nikolay Vasilyeviç Qoqolun “Evlənmə” komediyasında Yaiçnitsa obrazı olub. 23 fevral tarixində ilk və son premyerası oldu Elçin Həmidovun. Onun ölümü də çox qəfil və kədərli olub. 2011-ci il martın 4-də istedadlı aktyor qəflətən dünyasını dəyişib. Həmin vaxt teatrda "Hərənin öz ulduzu" tamaşasının orkestrlə məşqi idi. Heyf ki, bu tamaşada oynamaq Elçin Həmidova qismət olmayıb. Elçinin işə gəlmədiyini görən dostları onun evinə gediblər. Fövqaladə Hallar Nazirliyinin işçilərinin köməyilə qapı açılıb. Təəssüf ki, bu vaxt artıq Elçin Həmidov tək-tənha dünyasını dəyişib. Aktyor martın 5-də Xırdalan qəbiristanlığında torpağa tapşırılıb.