Fəridə Ağaəli qızı Vəlixanova 1935-ci il oktyabr ayının 21-də Bakı şəhərində anadan olub. M.V.Lomonosov adına Moskva Dövlət Universitetinə daxil olub, SSRİ EA M.Qorki adına Dünya Ədəbiyyatı İnstitutunun aspiranturasında təhsil alıb. Filologiya elmləri doktoru, professordur.

Çapdan çıxmış elmi əsərlərinin ümumi sayı 130-dan çoxdur. Onlardan bir neçəsi xaricdə nəşr edilib. Əsas elmi nailiyyətləri Azərbaycanda tərcüməşünaslıq elminin ilk tədqiqatçısı olması, ədəbiyyat nəzəriyyəsi və tarixinin dünya ədəbiyyatı kontekstində Qərb-Şərq probleminin tədqiqidir. “Səməd Vurğun poeziyasının rus tərcümələri” (1968), “Dostluq carçıları” (1974), “Azərbaycan sovet poeziyası rus dilində” (1977), “Tərcümə sənəti (ikidilli)” (1990), “Azərbaycanın tərcümə tarixi” (1994), “Azərbaycanın rusdilli nəsri” (1999), “Təkrarolunmaz milli ədəbiyyatların dialoqu” (2003), “XX əsr rusdilli milli ədəbiyyatlar” (2005), “Veymarlı dahi Şərqdə (İ.V.Höte “Qərb-Şərq Divanında” (2009) və tərcümə və tədqiqat əsərlərinin müəllifidir.

Həmçinin, kadr hazırlığı ilə də məşğul olub, onun rəhbərliyi ilə 16 elmlər namizədi, 5 elmlər doktoru müdafiə edib. Bakı Dövlət Universiteti və Slavyan Universitetində dərs deyib. AMEA-nın Nizami adına Ədəbiyyat İnstitutunda baş elmi işçi kimi fəaliyyət göstərir.

2005-ci ildə Azərbaycan Respublikası Prezidentinin Sərəncamı ilə “Əməkdar elm xadimi” fəxri adına layiq görülüb, AMEA-nın Fəxri fərmanı ilə təltif edilib.