Rövşən Abdulla oğlu Abdullayev 28 sentyabr 1978-ci ildə Bakı şəhərində ziyalı ailəsində anadan olub. Rövşən Abdullaoğlu 1995-ci ildə 116 saylı məktəbi bitirdikdən sonra Azərbaycan Dövlət İqtisad Universitetinə qəbul olub. Universitet təhsilini başa vurduqdan sonra Azərbaycan Respublikası Sərhəd Qoşunları sıralarına hərbi xidmətə yollanır, xidməti başa vurduğu zaman hərbi hissə komandirinin təşəkkür etimadnaməsi ilə təltif olunur.

Rövşən Abdullaoğlu təhsilini ərəb və fars dillərində, teologiya, sxolastika, ərəb ədəbiyyatı, Şərq və Qərb fəlsəfəsi sahəsi üzrə 8 ildən artıq müxtəlif ali məktəblərdə davam etdirıb.

2013-cü ildə Moskva Pozitiv Texnologiyalar və Konsaltinq İnstitutunun “Psixoloji Konsultasiya” fakültəsində “qeştalt-terapiyası” metodu üzrə məsləhətçi-psixoloq ixtisasına yiyələnib.

Yaradıcı fəaliyyətə məktəb illərindən başlayıb. 1990-cı illərdə idmana olan böyük həvəsi, güləşin müxtəlif növləri və akrobatika ilə məşğul olması ilk kitabının mövzusuna çevrilib.

Sonralar əlyazmasını itirdiyi bu kitabda o, idmanın nəzəri və fəlsəfi mahiyyətinə toxunur, ideal idmançı olmağın yollarını göstərir, bir növ müxtəlif fəndlərin sintezi olan yeni, mükəmməl bir idman növünü təsvir edib.

Universitetdə oxuyarkən sosial amillərin yeniyetmə psixologiyasına təsiri haqda ilk məqalələrini yazıb, təkamül nəzəriyyəsinin lehinə və əleyhinə olan faktları araşdırıb.

2010-cu ildə işıq üzü görmüş ilk kitabı olan “Nisbi təzkiyənin elmi əsasları” şəxsiyyətin mənəvi dirçəliş və tənəzzül amilindən, qəlbin xüsusiyyətlərindən, onda təcəlli edən zülmət və nur örtüyündən bəhs edir.

2011-ci ildə İbn Sinanın Şərqi mütəəssir buraxdığı kimi, Qərbi də təsirsiz qoymayan son kitablarından olan “Göstəriş və təlimatlar” (Kitab əl-işarat vət-tənbihat) kitabının tərcüməsinə başlayıb.

Məna tərcüməsi ilə yanaşı olaraq, Rövşən Abdullaoğlu İbn Sinanın məntiqinə və metafizikasına yönələn dərin izahlar təqdim edib. Əsər iki kitab şəklində: “Görüntülər” və “Ariflərin irfani məqamları” adları altında nəşr olunub.

2012-ci ildə növbəti tərcümə işi “Əl-Mizan” adlı çoxcildli təfsir kitabının müəllifi, məşhur alim, filosof Əllamə Təbatəbainin “İnsan” traktatı olub. Traktatın tərcümə və şərhi üç hissə şəklində nəşr olunub.

Elə həmin ildə İslam aləmində ilk əlyazma sayılan kitabın tərcüməsini həyata keçirir. Kitabın “İlk kitab” adlanması məhz buradan qaynaqlanır. Bu kitabda İslam cəmiyyətinin formalaşdığı erkən dönəmlərin tarixi hadisələri və siyasi fitnələr öz əksini tapıb.

Rövşən Abdullaoğlu yaradıcılığının növbəti mərhələsinə psixoloji motivasiya yanaşma tərzi xarakterikdir. Növbəti beş kitabında – “Arxadakı körpüləri yandırın”, “Hər bir insan hökmdardır”,“Çətin olsa da, həyat davam edir”, “Üsyan”, “Qorxular” əsərlərində müəllif Şərq və Qərb psixologiyasına müraciət edir, şəxsiyyətin maddi və mənəvi inkişafı yolunda teoloji və psixoloji yanaşma sintezinin istifadə edildiyi yeni motivasiya üsulları təqdim edir.

Vətənində Rövşən Abdullaoğlu öz debütü ilə xüsusilə məşhurluq qazanıb. “Bu şəhərdə kimsə yoxdur” adlı ilk psixoloji romanı 2016-2018-ci illər ərzində Azərbaycanda ən çox satılan kitab olub.

Müəllifin ikinci “Relslər üzərinə uzanmış adam” romanı heç də az uğur qazanmır, kitabın birinci tirajı cəmi iki həftəyə satılır.

Psixoloji mövzuda qələmə alınmış bu romanlar ümumbəşəri mənəvi dəyərlərə hörmətlə yanaşmaq, irqi, dini, milli mənsubiyyətinə baxmayaraq ətrafdakılara münasibətdə insanlıq və dözümlülük nümayiş etdirmək, həyatın məşəqqətlərini dəyanətlə qarşılamaq və ən əsası – qarşılıq istəmədən, sidq-ürəkdən sevməyə səsləyir.

2018-ci ildə intellektual psixoloji detektiv janrında yazılmış, adı ilə böyük maraq doğuran “Abaddon” kitabı işıq üzü görməsi ilə bütün gözləntiləri aşıb. Artıq oxucu kütləsinin sevgisini qazanmış olan müəllifin bu romanı cəmi üç saata satılıb. Nəşriyyat bir neçə gün ərzində ikinci tirajı çap edib.

2019-cu ilin mart ayında “Tanrı-mif, yoxsa həqiqət” silsiləsindən ilk kitab olan “Əsarət” işıq üzü görüb. Bu kitab müxtəlif ideoloji məktəblər tərəfindən "yaradan" anlayışının qızğın müdafiəsinin və kəskin inkarının psixoloji səbəblərini açıqlayan elmi-populyar üslubda yazılmış vəsaitdir.

Hazırda Azərbaycanda Rövşən Abdullaoğlunun 25 kitabı çapdan çıxıb, onların əksəriyyəti bestseller olub, ingilis, rus, türk dillərinə tərcümə edilib.

Yazar öz əsərlərində psixologiya, fəlsəfə, motivasiya, irfan, həyat fəlsəfəsi, epistemologiya, ontologiya və teologiya sahələrinə aid mövzulara toxunur. Bundan əlavə, Rövşən Abdullaoğlu mütəmadi olaraq televiziya verilişlərində çıxış edir, fəlsəfə üzrə onlayn dərslər verir, məqalələri müxtəlif xəbər portallarında dərc olunur.