Söhrab Əbülfəz oğlu Tahir 1926-cı il avqust ayının 6-da (bəzi mənb. may ayının 27-də) Cənubi Azərbaycanın Astara şəhərində anadan olub. 1939-1943-cü illərdə “Səadət” və “Şahpur” məktəblərində 9-cu sinfədək təhsil alıb, ailə vəziyyətinin ağırlığı üzündən atası ilə “İran-İngilis neft şirkəti”ndə tornaçı, qaynaqçı, motorçu işləyib.

1941-ci ildə ailəsi ilə Təbrizə gedib, bir müddət atasının qaynaqçı sexində işləyib. Cənubi Azərbaycanda Milli hökumət qurulan zaman Azərbaycan Demokrat Partiyası Mərkəzi Komitəsi təşkilat şöbəsinin partiya bileti bölməsində möhürdar vəzifəsində işləyib. İlk mətbu şeiri olan “Yaşa, qüdrətli qoşun” 1949-cu ildə “Azərbaycan” qəzetində dərc olunub. O vaxtdan müntəzəm olaraq dövri mətbuatda “Ərdəbil”, “Təbrizim”, “Savalanım”, “Ərk qalası”, “Mərənd” və s. şeirlərini, hekayə, ədəbi-tənqidi və publisistik məqalələrini dərc etdirib. 1946-cı ildə Bakıya təhsil almağa göndərilib, Bakıda diş həkimliyi və feldşerlik mək­təbini bitirib. 1952-1957-ci illərdə Azərbaycan Dövlət Universitetinin (indiki BDU) Filologiya fakültəsində təhsil alıb, 1959-1961-ci illərdə Moskvada M.Qorki adına Ali Ədəbiyyat kurslarında müdavim olub. 1959-1961-ci illərdə eyni zamanda Azərbaycan Demokrat Firqəsi Mərkəzi Komitəsində (ADF MK-da) təlimatçı, ADF-nin Bakı şəhər komitəsinin birinci katibi, Cənubi Azərbaycan Yazıçılar Cəmiyyətinin sədri vəzifəsində çalışıb.

1962-1966-cı illərdə ADF-nin Bakı komitəsində birinci katib, 1967-1973-cü illərdə “Azərbaycan” jurnalı redaksiyasında məsul katib, 1974-1980-ci illərdə ADF MK orqanı “Azərbaycan” qəzetinin və “Azərbaycan” jurnalının redaksiyalarında bədii şöbədə müdir, ADF-nin nəzdində çıxan “Səhər” ədəbi-tarixi jurnalında baş redaktor müavini, 1981-1984-cü illərdə isə ADF MK-nın siyasi-nəzəri orqanı olan “Azərbaycan” jurnalının redaktoru olub.

1993-cü ildən Yeni Azərbaycan Partiyasının üzvü olub. 1993-2003-cü illərdə Azərbaycan Respublikası Elmlər Akademiyasının Milli Münasibətlər İnstitutunda aparıcı elmi işçi olub. 2003-cü ildən Azərbaycan Milli Elmlər Akademiyasının Şərqşünaslıq İnstitutunun böyük elmi işçisi idi.

İndiyə qədər 1000-dən çox şeiri, 57 poeması, 8 romanı, 10 povesti, 70-dən çox hekayəsi, 800-dən artıq ədəbi, elmi-publisistik məqaləsi çap olunub. 2005-ci ildə 20 cilddə “Əsərləri” nəşr edilib.

Bununla yanaşı, xarici ölkələrdə də kitabları nəşr edilib. İnqilabi, ədəbi-ictimai fəaliyyətinə görə Təbrizdə “21 Azər” medalı və bir sıra medallarla, Azərbaycan SSR Ali Soveti Rəyasət Heyətinin “Fəxri Fərmanı” ilə, 2010-cu ildə Rusiya Yazıçılar İttifaqı və onun Moskva şəhər təşkilatı nəzdində fəaliyyət göstərən Yazıçı tərcüməçilər İttifaqının qərarı ilə Beynəlxalq V.V. Mayakovski ordeni ilə təltif olunub. 1984-cü ildə “Əməkdar mədəniy­yət işçisi”, 1998-ci ildə “Xalq şairi” fəxri adlarına layiq görülüb. 2006-cı ildə Azərbaycan Respublikası Prezidentinin Sərəncamı ilə “Şöhrət” ordeni ilə təltif olunub.

Söhrab Əbülfəz oğlu Tahir 2016-cı il may ayının 4-də vəfat edib, II Fəxri Xiyabanda dəfn olunub.