Qabil Quliyev 19 aprel 1949-cu ildə Cəlilabad rayonunun Tahirli kəndində anadan olub. O, ilk təhsilini 8 illik kənd məktəbində, orta təhsilini Cəlilabad 1 saylı tam orta məktəbində alıb. 1966-cı ildə orta məktəbin 10-cu sinfini bitirdikdən sonra Bakı Neft Sənayesi məktəbində oxuyub və bu təhsil ocağını fərqlənmə diplomu ilə bitirərək 1968-ci ildə M.A.Əliyev adına Azərbaycan Dövlət İncəsənət İnstitutunun “Dram və kino aktyorluğu” fakültəsinin əyani şöbəsinə daxil olub. Azərbaycanın Xalq artistləri Əliheydər Ələkbərov və professor Rza Təhmasibin sinfində təhsil alıb. Tələbəlik illərində Akademik Dövlət Dram Teatrında əvvəlcə səhnə quraşdırıcısı, sonra isə yardımçı aktyor heyətində aktyor kimi çalışıb. 

1972-ci ildə institutu bitirdikdən sonra təyinatla onu Sumqayıt Dövlət Musiqili Dram Teatrına göndərsələr də, bu təyinatla razılaşmayıb hərbi xidmətə yollanıb və Moskvada “Mosfilm” kinostudiyasının hərbiləşdirilmiş kino-bazasında xidmət edib. O, burada kütləvi səhnələrin çəkilişlərində iştirak edib, kaskadyorluq sənətinin sirrlərinə yiyələnib. Bir ildən sonra hərbi xidmətini başa vuraraq vətənə dönüb və taleyini Lənkəran Dövlət Dram Teatrına bağlayıb.

Ailəlidir, iki qız övladı var. 

Qabil Quliyev 1973-cü ildən Nəcəf bəy Vəzirov adına Lənkəran Dövlət Dram Teatrında aktyor vəzifəsində çalışır. 100-dən artıq tamaşada rol alıb. Bir neçə bədii filmə çəkilib. Lənkəran Dövlət Universitetində 12 il etika, estetikavə kulturologiyadan dərs deyib.

Xalq artisti Azərbaycan Teatr Xadimləri İttifaqının “Şərəf” mükafatına layiq görülüb.