Kamal Ağahüseyn oğlu Xudaverdiyev 3 may 1938-ci ildə Bakıda doğulub.

1965-ci ildə ali təhsilini başa vuran Kamal Xudaverdiyev Akademik Milli Dram Teatrının baş rejissoru Tofiq Kazımovun təklifi ilə oktyabr ayının 1-də truppaya ştata götürülüb. Arada qısa fasiləni çıxmaqla yalnız bu teatrda işləyib. Bu illər ərzində Raul ("Orlean qızı" Fridrix Şiller), Fərman ("Yalan" Sabit Rəhman), İbad ("Almaz" Cəfər Cabbarlı), Kral Lir ("Kral Lir" Uilyam Şekspir), Sezar ("Kölgələrin oyunu" Y.Edlis), Murtuza Muxtarov ("Mesenat" Əli Əmirli) və sair rolları oynayıb.

Aktyor teatrdan əlavə Azərbaycan Dövlət Televiziyasında da hazırlanan tamaşalarda çoxlu obrazlar ifa edib. Bunlara misal olaraq İlyas Əfəndiyevin "Atayevlər ailəsi" (İldırım), Ənvər Məmmədxanlının "Şərqin səhəri" (Cavanşir bəy), Mehdi Hüseynin "Alov" (Qaşqay), Əlibala Hacızadənin "Yadigar" (müəllim), Elçin Mehrəliyevin "Yurd yeri" (Mahal kişi) tamaşalarında oynadığı rolları göstərmək olar.

Müxtəlif illərdə "Azərbaycanfilm" kinostudiyasında "İstintaq davam edir" (Çingizov), "Ən vacib müsahibə" (Həsənov), "Dağlarda döyüş" (Rüstəmov), "Nəsimi" (Yusif), "Abşeron" (Əli), "Üzü küləyə" (kombinat müdiri), "Adanı özünlə apara bilməzsən" (ata), "Otel otağı" (alim), "Dədə Qorqud" (ata) filmlərində xaraktercə fərqli obrazlara çəkilib.

Kamal Ağahüseyn oğlu Xudaverdiyev teatr və kino yaradıcılığındakı səmərəli fəaliyyətinə görə 1 dekabr 1982-ci ildə "Azərbaycan SSR-nin Əməkdar artisti", 22 may 1991-ci ildə isə "Azərbaycan Respublikasının Xalq artisti" fəxri adlarına layiq görülüb. Prezident təqaüdçüsü idi.

23 aprel 2008-ci ildə vəfat edib.