Azərbaycanın Əməkdar incəsənət xadimi Cahangir Mehdiyev 13 yanvar 1951-ci ildə Bakıda anadan olub. Bakı şəhərində 158 saylı orta və 12 saylı musiqi məktəblərini bitirib. Sənətdə ilk addımlarını 6 yaşında ikən görkəmli rejissor Lətif Səfərovun "Bakı və bakılılar" filmində atıb. M.A.Əliyev adına ADİİ-nin Dram teatrı və televiziya rejissorluğu fakültəsində (1968-1973) təhsil aldığı illərdə, 1969-cu ildə "Dəli Kür" bədii filmində aktyor kimi oynayıb.

1973-cü ildə diplom işi kimi Azərbaycan Milli Akademik Dram Teatrında "Sevgi, sevgi" teatr tamaşasına, eləcə də Azərbaycan Respublikası Dövlət Televiziya və Radio Verilişləri Şirkətinin Ədəbi dram, incəsənət redaksiyasında "Yumoristik novellalar" adlı televizya tamaşasına quruluş verib.

1973-cü ildə institutu əla qiymətlərlə bitirib, C.Cabbarlı adına "Azərbaycanfilm" kinostudiyasında bədii filmlər üzrə rejissor assisenti kimi çalışmağa başlayıb.

1974-cü ildə kimostudiyanın göndərişi ilə Moskvada Ümümittifaq Dövlət Kinematoqrafiya İnstitutunun rejissorluq fakültəsində, Georgi Daneliyanın emalatxanasında təhsil alıb. 1979-cu ildə təhsilini əla qiymətlərlə başa vurub və "Azərbaycanfilm" kinostudiyasında rejissor işləməyə başlayıb.“Diplom işi” adlı qısametrajlı filmlə diplom müdafiəsini edən gənc rejissor həmin filmlə Cexoslovakiyanın Karlovı-Varı, Almanyanın Oberhauzen, Manheym və İspanyanın Bilbao şəhərlərində keçirilən kinofestivallarda “Ən yaxşı tələbə işi” kimi ilk mükafat və diplomlarını alıb.

1980-cı ildə Bakıda Lenin meydanında keçirilən Azərbaycan SSR-in 60 illik yubileyinə həsr olunmuş bədi-kütləvi meydan tamaşasında quruluşçu rejissor kimi fəaliyyət göstərib. Bu fəaliyyətinə görə Azərbaycan SSR-in mükafatına və diploma layiq görülüb.

1980-cı ildə "Mosfilim” kinostudiyasının nəzdində yaradılmış "Debüt" adlı studiyada ("Gənclərin Ekspirimental Yaradıcılıq Birliyi"ndə) "Vah!" ("Bıy!") kinokomediyasının quruluşcu rejissoru olub. 1980-ci ildə "Mosfilm" kinostudiyasında keçirilən 11-ci Beynəlxalq Kinofestivalda "Vah!" kinokomediyası "Ən yaxşı rejissor işinə görə", Minsk şəhərindəki kinofestivalda isə "Ən yaxşı komediya işinə görə" mükafat alıb.

Komediya janrında çəkdiyi “Vah!”, “Evlənmək istəyirəm”, “Kişi sözü”, “Gənc qadının kişisi”, “Girişmə öldürər” və digər filmləri öz dəsti-xətti ilə seçilərək tamaşaçılar tərəfindən rəğbətlə qarşılanır və sevilə-sevilə baxılıb. Onun filmləri bir çox beynəlxalq festivallarda Azərbaycanı layiqincə təmsil edib və mükafatlara layiq görülüb.

Cahangir Mehdiyev 1979-cu ildən 1998-ci ilə qədər C.Cabbarlı adına "Azərbaycanfilm" kinostudiyasında rejissor, quruluşçu rejissor, ssenarist və aktyor kimi fəaliyyət göstərib.1990-1995-ci illərdə Azərbaycan Respublikası Mədəniyyət Fondunun icraçı direktoru vəzifəsində işləyib. 1998-ci ildən 2007-ci ilə qədər "Mozalan" studiyasının direktoru, bədii rəhbəri olub.

1998-ci ildə “Azərbaycan Respublikasının Əməkdar məşqçisi”, 2000-ci ildə “Azərbaycan Respublikasının Əməkdar incəsənət xadimi” fəxri adlarına layiq görülüb.

1998-ci ildən 2007-ci ilədək Boulinq Federasiyasının vitse-prezidenti olub.

2001-ci ildən 2005-ci ilə qədər Lider TV-də "Sağlam bədəndə sağlam ruh" adlı silsilə televizya idman və bədən tərbiyəsi verilişinin rejissoru, aparıcısı və müəllifi olub.

25 avqust 2005-ci ildə Moskva şəhərindəki "Prezident Otel" mehmanxanasında dünya şöhrətli kinorejissor, SSRİ-nin Xalq artisti Georgi Nikolayeviç Daneliyanın 75 illik yubleyində iştirak edib. Yubileydə G.Daneliyanın iki cildlik (1-Bezbilentnıy passajir. 2- Tostuyemıy pyot do dna) kitabının təqdimatı keçirilib. Kitabın birinci cildində C.Mehdiyev ilə onun müəllimi, kurs rəhbəri G. Daneliya arasındakı münasibətlərdən bəhs olunur. İkinci cilddə isə C.Mehdiyevə həsr olunmuş "Güzgü" adlı hekayə yer alır. Bu hekayənin qəhrəmanı da Cahangir Mehdiyevdir.

1 aprel 2006-cı ildə Sürix şəhərindəki "Intercontinental Surix Otel"də keçirilən 25-ci Beynəlxalq mükafatın təqdimat mərasimində, seçim komissiyasının qərarına əsasən "Mozalan" studiyasının direktoru və bədii rəhbəri kimi "Nüfuz və keyfiyyətdə lider-Avropa-2006"-cı ilin ən ali beynəlxalq mükafatına layiq görülüb.

30 yanvar 2007-ci ildə bu mükafatı xatirə olaraq "Heydər Əliyev" fonduna hədiyyə edib.

2007-ci ildən 2016-cı ilədək Azərbaycan Televiziya və Radio Verilişləri QSC-də (Azərbaycantelefilm Yaradıcılıq Birliyində) ali kateqoriyalı rejissor kimi fəaliyyət göstərib. 2016-cı ildə təqaüdə çıxıb.

2011-ci ildən Azərbaycan Respublikası Milli Olimpya Komitəsində çəkiliş qrupunun rəhbəri kimi çalışır.

Cahangir Mehdiyev Azərbayca Respublikası Kinematoqrafçılar İttifaqının və Professional Kinorejissorlar Gildiyasının üzvü olaraq milli kinematoqrafın ictimai həyatında fəal iştirak edən, gənc kadrların hazırlanmasına və formalaşmasına öz töhfəsini verən bir sənətçidir.