Azad Nəbiyev 1945-ci il aprelin 20-də Quba rayonunun İkinci Nügədi kəndində anadan olub. Burada  kənd  orta  məktəbini  bitirdikdən sonra  Azərbaycan  Dövlət  Universitetinin  Filologiya  fakültəsinin  Jurnalistika şöbəsində  təhsil  alıb (1963-1967). Əmək  fəaliyyətinə  Azərbaycan  Dövlət Nəşriyyatında  redactor  kimi  başlayıb (1967-1974). "Gənclik"  nəşriyyatında redaksiya  müdiri (1974-1976), Azərbaycan  Dövlət  Universitetinin  Filologiya fakültəsində  müəllim, baş müəllim, professor vəzifələrində çalışıb (1976-1989). "Dirçəliş və Tərəqqi Partiyası"nın sədri olub (1992-2000). Beynəlxalq Ekoenergetika  Akademiyasına  həqiqi  üzv  seçilib (1997). Beynəlxalq Əlillər Federasiyası idarə heyətinin üzvü olub (1998-ci ildən ölümünə qədər).

Ədəbi fəaliyyətə 60-cı illərdən başlayıb. İlk şeiri 1962-ci ildə "Qızıl Quba" rayon qəzetində  çap olunub. Bundan sonra qəzet və jurnallarda şeir, hekayə, povest, oçerk və məqalələrlə çıxış edib. "Koroğlu dastanı" mövzusunda namizədlik dissertasiyası müdafıə edib (1972). "Azərbaycan-Özbək folklorunun tipologiyası və qarşılıqlı əlaqəsi" mövzusunda doktorluq dissertasiyası müdafiə edib (1980). İtalyan ("Bertoltonun sərgüzəştləri") və özbək ("Tülkü və qurd") xalq nağıllarından tərcümələr edib. "Kitabi Dədə Qorqud"un Drezden nüsxəsi mətnini sadələşdirib nəşr edib (2000). "Azərbaycan dastanları" (1977), "Nəğmələr, inanclar, alqışlar, adətlər" (1986), "Alqışlar, adətlər, nəğmələr" (1992), "Koroğlu dastanı" (2001) kitablarının toplayanı, nəşrə hazırlayanı və ön sözlərinin müəllifidir.