Məmmədpaşa Piri oğlu Quluzadə 1914-cü il sentyabrın 5-də Bakının Əmircan kəndində anadan olub.1927-ci ildə N.Nərimanov adına Sənaye Texnikumuna daxil olub.1932-1938-ci illərdə Azərbaycan Sənaye İnstitutunun (indiki ADNSU) neft-mədən fakültəsində təhsil alıb, oranı fərqlənmə diplomu ilə bitirib və qazma üzrə dağ mühəndisi ixtisasına yiyələnib.

1951-1964-cü illərdə institutda assistent, dosent, professor, Neft və qaz quyularının qazılması kafedrasının müdiri, institutun elmi işlər üzrə prorektoru vəzifələrində çalışıb. 1958-1964-cü illərdə Ümumittifaq “Neft və Qaz” jurnalının məsul redaktoru olub. Akademikin elmi-tədqiqat işləri neft elminin və texnikasının inkişafına, xüsusən də neft və qaz quyularının qazılma texnologiyasının nəzəriyyə və təcrübəsinə həsr edilib. Yerinə yetirilmiş elmi-tədqiqat işlərinin nəticələri Azərbaycanda, Qərbi Sibirdə, Qazaxıstanda, Krımda, Başqırdıstanda, Saxalində və başqa neft-qaz rayonlarında tətbiq edilmişdir.

Bu gün Xəzər dənizində maili quyuların qazılması işlərinin nəzəri və mühəndisi əsasını akademikin yerinə yetirdiyi elmi-tədqiqat işləri təşkil edir. Bu üsulun geniş miqyasda tətbiqinə görə M.Quluzadə bir qrup alim və mütəxəssislə birlikdə 1972-ci ildə Azərbaycan Respublikasının dövlət mükafatına layiq görülüb. 1968-ci ildə Azərbaycan Elmlər Akademiyasının müxbir üzvü, 1972- ci ildə isə həqiqi üzvü seçilib.

Akademik məruzə və çıxışları ilə ABŞ, Almaniya, Hindistan, Meksika və digər ölkələrdə keçirilən konqres və simpoziumlarda Azərbaycan elmini ləyaqətlə təmsil edib. M.P.Quluzadə SSRİ Nazirlər Sovetinin Elm və Texnika Komitəsi yanında dərin neft və qaz quyularının qazılması texnikası və texnologiyasının təkmilləşdirilməsi üzrə elmi-texniki komissiyanın, SSRİ Neftçıxarma Sənayesi Nazirliyinin elmi-texniki şurasının, SSRİ Ali təhsil Nazirliyinin neft təhsili üzrə elmi-texniki şurasının, Azərbaycan EA-nın “Elm və torpaq” elmi şurasının doktorluq və namizədlik alimlik dərəcələri verən ixtisaslaşdırılmış Elmi Şuranın, Azərbaycan Ensiklopediyası baş redaksiyasının elmi şurasının, “Neft və qaz” jurnalının ilk redaktoru və redaksiya heyətinin üzvü olub.

400 elmi əsərin, o cümlədən 15 monoqrafiya, 15 ixtira və kəşflərin və Azərbaycan dilində yazılmış ilk fundamental dərsliklərin, dərs vəsaitlərinin müəllifidir.O, rəhbərlik etdiyi 10 elmlər doktorunun elmi məsləhətçisi olub və 45 texnika elmləri namizədi hazırlayıb. Elm və texnikanın inkişafı və yüksəkixtisaslı kadrların hazırlanmasında xidmətlərinə görə M.Quluzadə “Lenin” və “Qırmızı Əmək Bayrağı”,“II dərəcəli Vətən müharibəsi” ordenləri, bir çox SSRİ medalları və Azərbaycan SSR Ali Sovetinin Fəxri fərmanları ilə təltif olunub.

Görkəmli alim Məmmədpaşa Quluzadə 1994-cü il fevralın 28-də vəfat edib.

Allah rəhmət eləsin.