XƏBƏRLƏR
MƏLUMAT
Bu gün Mehdi bəy Süleyman oğlu Hacınskinin doğum günüdür
ÜMÜMİ XƏBƏRLƏR
24/05/2019 09:13

Mehdi bəy Süleyman oğlu Hacınski 1879-cu il mayın 24-də Qubada anadan olub. Əvvəlcə mədrəsədə oxuyan Mehdi sonra təhsilini türk-rus realnı məktəbində davam etdirib. Rus və fars dillərini mükəmməl öyrənib. Azərbaycan Dövlət Universitetinin (indiki BDU) filologiya və hüquq fakültələrində təhsil alıb.

1896-cı ildə Bakıda müsəlman teatr truppasının təşkilində fəal iştirak edib. 1906-cı ildə ikinci teatr truppasının, sonralar Artistlər Şurasının üzvü olub. Hacınskinin ilk çıxışı Nəriman Nərimanovun “Nadanlıq” əsərində olub.

1906-cı ildən “Nicat”ın teatr bölməsinin rəhbəri, “Nəşri-maarif” cəmiyyətinin sədr müavini, 3 il “Səfa” cəmiyyəti xalq məktəblərinin rəisi, 1914-cü ildən teatr bölməsinin sədr müavini olub. Bakı teatrlarında müxtəlif xarakterli obrazlar - Karl Moor (“Qaçaqlar”, F.Şiller), Nadir şah (“Nadir şah”, N.Nərimanov) yaradıb. İlk məqaləsi İsmayıl bəy Qaspralının “Tərcüman” qəzetinin 1898-ci il 8 dekabr tarixli sayında Azərbaycan və rus dillərində dərc olunub.

“Kaspi”, “Həyat”, “İqbal”, “İrşad” və s. qəzetlərdə, “Zənbur”, “Molla Nəsrəddin” jurnallarında “Ürfüzadə”, “Dəmdəməki”, “Avara”, “Estet” və s. imzalarla Azərbaycan teatrına, aktyor sənətinə dair məqalələr, hekayə, oçerk və felyetonlar dərc etdirib. 1906-1907-ci illərdə bir müddət “Hümmət” təşkilatının orqanı olan “Təkamül” qəzetinin naşiri olub.

“Sultan Əbdüləzizin xəli, yaxud ilk Türk Cümhuriyyəti” adlı dram əsəri var. “Müsavat” partiyasının üzvü olub, 1917-ci ildə partiyanın Bakı bürosunun tərkibinə seçilib, 1918-ci il mayın 26-da Zaqafqaziya seyminin, Zaqafqaziya Demokratik Federativ Respublikasının süqutundan sonra 1918-ci il mayın 27-də Azərbaycan Milli Şurasının üzvü olub.

Milli Milli Şuranın 1918-ci il 19 noyabr tarixli “Azərbaycan Məclisi Məbusanının təsisi haqqında qanun”na əsasən, Azərbaycan Xalq Cümhuriyyəti Parlamentinin tərkibinə daxil edilib, rəyasət heyətinin katibi olub. Azərbaycan Sovet Sosialist Respublikası məhkəmə xadimlərinin 1-ci qurultayında xalq hakimləri şurası rəyasət heyətinin üzvü seçilib.

Xalq ərzaq komissarının, xalq maarif komissarının müavini təyin edilib, Naxçıvan Muxtar Sovet Sosialist Respublikası Ali İqtisadi Şurasının üzvü və muxtar respublikanın tədqiqi üzrə komitənin sədri seçilib. AXTŞ-nin “Xalq təsərrüfatı” jurnalı redaksiya kollegiyasının üzvü olub, Azərbaycanın dövlət qulluqçuları üçün türk dili kurslarına rəhbərlik edib. Mehdi bəy Hacınski 1941-ci ilin iyunun 18-də Bakıda vəfat edib.

Baxış sayı: 13203