Azərbaycan rəngkarı, qrafika ustası, professor Arif Ələsgərov 18 mart 1944-cü ildə Bakı şəhərində anadan olub. O, 1959–1964-cü illərdə Əzim Əzimzadə adına Azərbaycan Dövlət Rəssamlıq Məktəbində, 1964–1972-ci illərdə isə V.İ.Muxina adına Leninqrad Ali Bədii-Sənaye Məktəbində təhsil alıb.

Arif Ələsgərov 1972–1977-ci illərdə məzunu olduğu Azərbaycan Dövlət Rəssamlıq Məktəbində müəllim, 1977–2001-ci illərdə isə Azərbaycan Dövlət Mədəniyyət və İncəsənət Universitetində müəllim, baş müəllim və dosent işləyib. 2001–2008-ci illərdə Azərbaycan Dövlət Akademiyasında kafedra müdiri işləyib və professor elmi adını alıb. 2008-ci ildən Türkiyənin Trabzon şəhərində Qaradəniz Texniki Universitetində Rəssamlıq fakültəsinin yaradıcısı, professoru və kafedra müdiridir.

Arif Ələsgərov 1975-ci ildə SSRİ Rəssamlar İttifaqına üzv seçilib. 1992-ci ildə "Əməkdar rəssam" fəxri adına layiq görülüb. Hazırda Türkiyədə yaşayır.

Tanınmış rəssamın yaradıcılığında milli dəyərlərin, ədəbi irsin, türkçülük ideyalarının və qədim ənənələrin təbliğatçısı kimi çıxış edir, fərdi dəst-xəttə və özünəməxsus qrafik üsluba malikdir. Onun dəzgah qrafikasının əsas mövzusu Abşeron, Bakı və bakılılardır. Rəssamın çoxsaylı kompozisiyalarının, eləcə də "Ayaqqabıçı", "Xatirələr", "Balıqçı" və başqa əsərlərinin leytmotivini nostalgiya, Bakı mühiti, milli-mədəni köklərə bağlılıq təşkil edir. Arif Ələsgərovun qrafik lövhələri üçün şərti ifadə tərzinin bədii estetikliyini saxlamaq xasdır. Onun yaradıcılığının bu istiqamətində "Qocalar-idmançılar" və "Bizim veteranlar" adlı iki böyük silsilə əsas yer tutur.

2000-ci illərdə rəssamın yaradıcılığında dekorativ şərti başlanğıca meyl daha da güclənir, konkret motivlərin ümumiləşdirilməsi, "İpək yolu", "Gənc ailə", "Ağaclar" kimi əsərlərində lirik obrazlılığa nail olmaq cəhdi üstünlük təşkil edir. Arif Ələsgərov yaradıcılığının mövzu və bədii obrazlar dairəsi müxtəlifdir. Bəzən rəssamın mücərrəd yaradıcı təfəkkürü, onu hər hansı fiqurativlikdən tamamilə azad olan əsərlər yaratmağa sövq edir. Bu əsərlərdə real aləmin əşya və personajlarına eyham olmur. Onun "Həyatın başlanğıcı", "Göy qurşağı", "Röya", "Köhnə həyət" və başqa əsərlərində harmoniya və sakitliyin hökm sürdüyü gizli daxili aləm öz əksini tapır.

Rəssam "Estamp tarixi və ofort" və "Dizaynda kompozisiya" adlı dərsliklərin müəllifidir.

Arif Ələsgərov 1986-cı ildə Zaqafqaziya Respublikalarının bienalesinin Qızıl medalına, 1987-ci ildə SSRİ Rəssamlar İttifaqının mükafatına, 2001-ci ildə isə "Sultan Məhəmməd" mükafatına layiq görülüb.