Asəf Cəfərov 28 iyul 1927-ci ildə Bakıda, İçərişəhərdə anadan olub. 1945–1950-ci illərdə Ə.Əzimzadə adına Rəssamlıq Məktəbində ilk rəssamlıq təhsilini alıb, 1951–1957-ci illərdə B.İ.Surikov adına Rəssamlıq İnstitutunda ali təhsilini davam etdirib. 1957-ci ildə institut tərəfindən Hindistan va Pakistana yaradıcılıq ezamiyyətinə göndərilib. “Bilərzik seçimi” (1957) həmin dövrün seçilən işlərindəndir.

A.Cəfərov tematik tablo, portret, mənzərə və natürmort janrlarında özünəməxsus kompozisiya, kolorit və işlənilmə üslubu ilə fərqlənən əsərlər qalereyası yaradıb.

Onun yaradıcılığında milli çalarlar, folklora müraciət və ənənəvi məzmunlu mövzular üstünlük təşkil edib. Rəssam bədii estetik təsir yükünə malik süjetli əsərlər yaradıb. Buna misal olaraq “Tarlada”, “Dəniz kənarında”, “Görüş”, “Mənim Azərbaycanım”, “Musiqiçilər” və başqalarını qeyd etmək olar. Asəf Cəfərov həm də bir çox portretlərin müəllifidir. Buna misal olaraq onun “Ə.Vahid”, “V.Mustafazadə”, “S.Bəhlulzadə”, “Arif Məlikov”, “Cəfər Cabbarlı”, “Vəcihə Səmədova”, “Rəşid Behbudov” və s. portretlərini göstərmək olar. Rəssam bölgələrə yaradıcılıq ezamiyyətlərindən sonra maraqlı əsərlər yaradıb. “Bakıda qar”, “Qaş-Qaş”, “Xəzər dənizi” adlı mənzərələri fırça ustasının belə əsərlərindəndir. O, həmçinin Abşeron mənzərələri silsiləsi üzərində işləyib: “Abşeron”, “Daş hasarlar”, “Maştağa kəndi”, “Abşeronun qızıl qumları”, “Bakıda qış”, “İsti gün”, “Qış”, “Əncir kolu”, “Bahar”, “Axşam motivi” və s. A.Cəfərov tarixi janra da müraciət edib. Bu sıradan “Nəsimi azad düşüncəlilərin məclisində”, “Oyanış” əsərlərinin adını qeyd etmək olar.

Asəf Cəfərov yaradıcılıq ezamiyyətlərində olduğu xarici ölkələrdə (İtaliya, Avstriya, Almaniya və s.) yeni ruhlu tablolar çəkib. Rəssam bir çox beynəlxalq sərgilərin iştrakçısı olub, Avstriyada “Dünya Təsviri Sənət Sərgisi”ndə (1980) “Qran-Pri” mükafatını qazanıb.

Asəf Cəfərov 3 aprel 2000-ci ildə Bakı şəhərində vəfat edib.