Sadıq Saleh Bağırov 19 mart 1907-ci ildə Bakı şəhərində anadan olub. Üçsinifli şəhər, sonra üç il 9 saylı, 1920–1922-ci illərdə sovet fəhlə məktəblərində təhsil alıb. 1926-cı ildə Əbilov adına klubun dram dərnəyinə üzv olub. Həmçinin Qaraşəhər, Metallist, Həkimlər klublarının dram dərnəklərində həvəskar aktyorluq edib. 1929–1932-ci illərdə Mirzə Fətəli Axundzadə adına Bakı Teatr Məktəbində aktyorluq təhsili alıb. Tələbə vaxtı Akademik Milli Dram Teatrının yardımçı heyətinə götürülüb. Təhsilini başa çatdırdıqdan sonra isə bu truppada işə başlayıb.

Aktyor sənətə 1925-ci ildə gəlib. Teatra məhəbbət Sadıq Salehdə çox gənc yaşlarında yaranıb. O, "Əbilov" adına, "Şvarts" adına və başqa klublarda həvəskar kollektivlərin fəal iştirakçısı olub. Burada, klub səhnəsində özünün aktyor məharətini göstərir, həyatını incəsənətə həsr etməyi qərara alır.

O, səhnədə keçirdiyi yarıməsrlik bir dövrdə istər öz dramaturqlarımızın, istərsə də başqa dramaturqların əsərlərindəki onlarca obraza öz aktyorluq bacarığı ilə yeni ruh, yeni təravət gətirib. O, oynadığı rolun böyük və ya kiçikliyindən, mənfi və ya müsbət olmasından asılı olmayaraq ən kiçik detallarına belə diqqət yetirib, obrazın daxili aləmini tamaşaçılara bacarıqla çatdırıb.

Sadıq Salehin M.Əzizbəyov adına Azərbaycan Dövlət Akademik Dram Teatrı səhnəsində oynadığı müxtəlif planlı, müxtəlif xarakterli rolların sayı yüzdən çoxdur. O, klassik və müasir pyeslərdə müsbət və mənfi personajlar oynayıb.

Azərbaycan SSR əməkdar artisti 1959-cü ildə Moskvada keçirilən "Azərbaycan Ədəbiyyatı və İncəsənəti Ongünlüyündə" iştirak edib və həmin il, iyunun 10-da "Azərbaycan SSR əməkdar artisti" adına layiq görülüb. Sadıq Saleh Azərbaycan SSR Ali Soveti Rəyasət Heyətinin Fəxri Fərmanı və bir sıra medallarla təltif edilib.