Azərbaycanlı yazıçı, şair, tərcüməçi, dramaturq, ədəbiyyatşünas, ictimai xadim, filologiya elmləri doktoru Əzizə Yəhya qızı Əhmədova 26 yanvar 1932-ci ildə Bakıda anadan olub.

İlk təhsilini doğma şəhərdə alan Əzizə Əhmədova əvvəlcə pedaqoji texnikumu bitirib. Amma yaradıcılığa olan marağı onu Azərbaycan Dövlət Universitetinin jurnalistika şöbəsində təhsil almağa vadar edib. Buranı bitirdikdən sonra "Uşaq və gənclər" nəşriyyatında əmək fəaliyyətinə başlayıb. Elə ədəbi yaradıcılığı da o illərdən başlanğıc götürüb. İlk hekayəsi olan "Qorxmazın səhvi" 1957-ci ildə "Pioner" jurnalında dərc edilib. Əzizə son dərəcə məhsuldar işləyib. Hekayələri, pyesləri ilə yanaşı, tərcümələri də müntəzəm olaraq oxuculara çatdırılıb.

Əzizə Əhmədova Azərbaycan Sovet Ensiklopediyasında böyük redaktor vəzifəsində çalışıb.1967-ci ildə isə "Gənclik" nəşriyyatına direktor təyin edilib. Əzizə xanımın əsərləri keçmiş SSRİ və xarici ölkə xalqlarının dillərinə tərcümə edilib. Bir müəllif kimi onlarla kitabı dərc olunub. Əzizə Əhmədovanın əsərləri 30, 40, 50 min tirajla çap edilib, bunlardan "Xınalı qayalar", "Yaz qarı", "Onu çiçəklər sevdi", "Bu ellərə vurulmuşam", "Bir ürək sındırmışam", "Çiçəklərim" və digərlərinin adlarını sadalamaq olar.

Əzizə Əhmədova tərçüməçi kimidə böyük işlər görüb.  V.Hauf, A.Kuprin, A.Qaydar, İ.Franko, S.Magilevskaya, C.Barri, M.Prilejayeva, A.Rıbakov, A.Lindqren və onlarla başqalarının əsərlərini Azərbaycan dilinə tərcümə edib.

1985-ci ildə Əzizə xanımın yeni kitabı olan "Damda yaşayan Karlsonla bacada yaşayan Damdabacanın macəraları" böyük əks-səda doğurub.

Əzizə Əhmədovanın mətbuatda dərc edilmiş son hekayələrindən biri "Ümid yaşadır bizi" adlanır. Ötən əsrin sonlarında baş verən ziddiyyətli məqamlar, quruluşun dəyişməsi, bədnam qonşularımızın torpaq iddiaları yazıçının da ovqatında bir kədər və bədbinlik yaradıb.Lakin qələminə və sözünə sadiqliyi onu başqa bir ümidin əllərinə tapşırır. O inanır ki, hər şey yaxşı olacaq. Bu səbəbdən də ümidlə yaşamağın, həyata inamla baxmağın tərəfdarı idi. Həmişə gözəllikdən, vətənin füsunkarlığından, gənclərin sevgi duyğularından, balacaların şıltaq dolu həyatından maraqlı, yaddaqalan əsərlər yaradan Əzizə Əhmədova həyatın ağrı-acılarının içindən sıyrılıb çıxmağı bacaran qələm sahibi idi. Belə bir fikri var idi: "Bədii əsər hər kəsi mənəvi cəhətdən təmizləməli, onun ürəyinə, duyğularına bir sevinc bəxş etməlidir. Gərək mütaliə edəndə ürəyin sıxılmasın, duyğuların qanad açsın, həyata, yaşamağa həvəsin daha çox olsun". Onun aləmində hər bir əsərin motivində həyat eşqi dayanmalı idi. Bu səbəbdən də Əzizə Əhmədova müşahidələrini duyğularının süzgəcindən keçirərək elə tərzdə qələmə alırdı ki, həqiqətən də onu oxumaqdan həzz alırdın. Ən bədbin, həyatdan küsmüş insanın ürəyinə də bir sevinc işartısı, mübarizlik ruhu gəlirdi. Əzizə Əhmədova həyatsevər bir insan idi. Təəssüf ki, başımıza gələn müsibətlər yaşının ahıl çağında onu çox sarsıtdı. Ömrünün sonlarında söhbət zamanı dediyi bir söz hələ də yaddaşımdan pozulmayıb: "Yaza bilmirəm. Qonşumuzun oğlu şəhid oldu. Vaxtilə mənim ən sevimli oxucum idi. Əlimə qələm alan kimi onun gözəl üzü xəyalıma gəlir. Allah ermənilərə lənət eləsin! Təkcə torpağımızı işğal etmədilər, duyğularımıza da ağır kədər, dərd gətirdilər". Zahirən də yaraşıqlı, gözəl bir xanım idi Əzizə Əhmədova. Ala gözlərindən daxili aləmini oxumaq çox asan idi. Mənəviyyatca zəngin, mükəmməl bir insan kimi həmkarlarının arasında böyük hörməti vardı. Təəssüf ki, üzləşdiyimiz bəlalar bu nikbin xanımın bütün varlığında qəflətən kədər dolu bir ovqat yaratdı. Çox istəyirdi ki, Qarabağın ağ günlərini görsün. Çox istəyirdi ki, vətəndən qaçqın düşmüş, didərginə, köçkünə çevrilmiş soydaşlarımız öz doğma yurd-yuvalarına qayıtsınlar. "Bax, onda bu mövzuda ən gözəl əsərimi yazacağam" - söyləyirdi. Təəssüf ki, əcəl aman vermədi və Əzizə xanım Müzəffər Qələbəmizi görə bilmədi. Yaşasaydı, indi 89 ilini tamamlayacaqdı. Təsəllimiz onadır ki, sözə könül bağlayanlar öz ömürlərini də bu əbədiyaşar varidatın ucalığında yaşadırlar. Əzizə Əhmədovanın kitabları, tərcümələri, dramları, cizgi filmləri üçün yazdığı ssenariləri həmişə onu xatırladacaq.