İyunun 14-də Bakı Şəhər Mədəniyyət Baş İdarəsi 15 İyun – Milli Qurtuluş Günü münasibətilə Heydər Əliyev adına Azərbaycan Ali Hərbi Məktəbində Xalq artisti Aygün Kazımovanın iştirakı ilə bayram konserti təşkil edib.

Azərbaycan Respublikasının Dövlət Himni ilə başlanan proqramda Ulu Öndər Heydər Əliyevin əziz xatirəsi bir dəqiqəlik sükutla yad edilib.

Konsertin aparıcıları Humay Muxtarova və Ayaz Məmmədov Ali Hərbi Məktəbin şəxsi heyətini salamlayaraq, 15 İyun – Milli Qurtuluş Günü münasibətilə onları təbrik ediblər.

Əlamətdar tarixə həsr olunmuş videoçarxda müasir Azərbaycan tarixində ümummilli lider Heydər Əliyevin adı ilə bağlı olan bu günün əhəmiyyəti və inkişaf etməkdə olan müstəqil dövlətimizin bərqərar olmasında Ulu Öndərin rolu vurğunıb. Azərbaycan Respublikasının Prezidenti cənab İlham Əliyevin ölkəmizdə sülhün, sabitliyin qorunub saxlanılması, ərazi bütövlüyümüzün bərpası, iqtisadiyyatımızın inkişafı və müasir tələblərə cavab verən ordu quruculuğunun təmin olunması istiqamətində gördüyü işlər qeyd edilib.

Konsertin rəsmi hissəsində mükafatlandırma mərasimi keçirilib.

Bədii hissə Azərbaycan Respublikasının Xalq artisti, sevilən sənətkarımız Aygün Kazımovanın hərbi vətənpərvərlik mövzulu nəğmələri və populyar mahnıları ilə davam edib.

Böyük ruh yüksəkliyi ilə keçən konsert Aygün Kazımovanın ifasında “Səma” rəqs ansamblının müşayiəti ilə “Azərbaycan” mahnısının sədalərı altında yekunlaşıb.

Tədbirin sonunda Xalq artisti Aygün Kazımovaya Azərbaycan Respublikası Müdafiə Nazirliyinin “Vətənə xidmətə görə” ordeni və Heydər Əliyev adına Azərbaycan Ali Hərbi Məktəbin mükafatı təqdim olunub.