“İçərişəhər” Dövlət Tarix-Memarlıq Qoruğu İdarəsi və “Artishok Agency” avqustun 18-də “Qala” Dövlət Tarix Etnoqrafiya Qoruğunda “Azeri Home Chef”in dəstəyi ilə birlikdə kulinariya üzrə ustad dərslərinə başlayıb.

Qoruq İdarəsindən AZƏRTAC-a bildirilib ki, layihənin keçirilməsində məqsəd müxtəlif xalqların mətbəxi ilə tanış olmaq, Azərbaycanın ləzzətli və unudulmuş yeməklərini yenidən həyata qaytarmaqdır. Proqram çərçivəsində usta aşpazlarla yanaşı, kulinariya həvəskarlarının və şəhərin qonaqlarının ustad dərsləri keçirilir. Ayda bir dəfə keçirilməsi nəzərdə tutulan ustad dərslərinin birinci məşğələsi ölkəmizə səfər edəcək ukraynalı qonaqlarla birlikdə təşkil edilib.