Aprelin 8-də "Azərbaycan Animasiya Assosiasiyası" (AAA) ictimai birliyinin yaradılması ilə bağlı görüş keçirilib. Onlayn görüşdə animasiya studiyalarının təmsilçiləri, animasiya sahəsində peşəkar və həvəskarlar AAA-nın qurulmasında iştirak etməyə maraq göstəriblər. 

Görüşdə Mədəniyyət Nazirliyinin Beynəlxalq əməkdaşlıq və innovativ inkişaf şöbəsinin Beynəlxalq layihələr və innovasiyalar sektorunun müdiri Ramil Abbəkirov iştirak edib. R.Abbəkirov qeyri-hökumət təşkilatlarının əhəmiyyəti və onların cəmiyyətə və mədəniyyətə fayda verə biləcəyi haqqında söhbət açıb. R.Abbəkirov həmçinin animasiya sənayəsinin perspektivliyi haqqında da geniş məlumat verib.

AAA-nın həmtəsisçisi Kamilə Məmmədova iştirakçılara tezliklə yaradılacaq AAA-nın dəyərləri, məqsədləri və strukturundan söz açıb. K.Məmmədova bildirib ki, “Azərbaycan Animasiya Assosiasiyası”nın əsas fəaliyyət istiqamətləri aşağıdakılardır: 

- Milli animasiya sənətini və istehsalatını inkişaf etdirmək

- Vahid onlayn animasiya platforması yaratmaq

- Animasiya vasitəsi ilə uşaqlarda, yeniyetmələrdə və böyüklərdə kreativliyi təşviq etmək

- Animasiya studiyalarına, animasiya pəşəkarlarına və həvəskarlara dəstək olmaq

- Milli animasiya maraqlarını müdafiə etmək

- Milli animasiyanı Azərbaycanda və xaricdə təbliğ etmək

Görüşdə həmçinin yazıçı Reyhan Yüsifqızı, animasiya rejissoru Firəngiz Qurbanova, animator Elşən Abdullayev və prodüser Rəşid Ağamalıyev çıxış ediblər.

Sonda tezliklə yaradılacaq ictimai birliyin təsisçiləri bütün iştirakçıları AAA-nın qurulmasında iştirak etməyə səsləyiblər.

Onlayn görüşü tam olaraq “YouTube” kanalından izləyə bilərsiniz: 

https://youtu.be/rRXluSQbjsA