İlkin Zülqədər oğlu Cavanşirov 1933-cü il sentyabrın 28-də anadan olub. 2 nömrəli taksi maşınları parkında sürücü işləyib. 9 övlad böyüdüb. O, müdhiş gecə güllə səsləri eşidəndə eyvana çıxıb. Küçədəkilər qışqırıblar ki, əsgərlər dinc əhalini qırır. O, oğlu Nüsrəti götürüb getmək istəyəndə evdə soruşublar ki, hara gedirsən? Cavab verib ki, gedim, bəlkə kiməsə kömək lazımdır. Getdi, kiməsə kömək elədi, ona isə kömək eləmək mümkün olmadı. Yaralını götürüb xəstəxanaya apararkən Avtovağzal rayonunda gülləyə tuş gəlib. İlkin kişi qolundan və başından yara alıb. 09-67 AQB nömrəli taksi maşınında 18 güllə yeri var. Yanvarın 23-də Semaşko adına təcili yardım xəstəxanasında vəfat edib.

9 uşaq atasının vəfatı Tümendəki “Alma” kooperativinin üzvlərini daha çox məyus edib. Onlar İlkin kişinin uşaqlarını həddi-buluğa çatanadək himayəyə götürüblər. Tək bircə ailənin dərdi görün neçə-neçə ürəkdə özünə yer tapıb.

İlkin Cavanşirov Şəhidlər Xiyabanında dəfn edilib.

Azərbaycan Respublikası Prezidentinin  1998-ci il 31 mart tarixli Fərmanı ilə ona ölümündən sonra “20 Yanvar Şəhidi” fəxri adı verilib.