Bakı Şəhər Mədəniyyət Baş İdarəsi Binəqədi rayon Mərkəzləşdirilmiş Kitabxana Sisteminin Mərkəzi Kitabxanasının Uşaq şöbəsi “1 İyun - Uşaqların Beynəlxalq Müdafiəsi Günü” adlı tədbir təşkil edib. 

Təbirdə 102 nömrəli tam orta məktəbin 2 “a” sinif şagirdləri və sinif müəllimi Dilşad Şeyxzadə, Rüstəm Əliyev adına 3 nömrəli tam orta məktəbin 1 “a” sinif şagirdləri və sinif müəllimi Zümrüd Əhədi iştirak edib.

Uşaq şöbəsinin müdiri Səidə Sərdarova balacaları Uşaqların Beynəlxalq Müdafiəsi Günü münasibətilə təbrik edib. Balaca oxuculara bu günün tarixi haqqında məlumat verilib. Qeyd olunub ki, 1950-ci il iyunun 1-də BMT Baş Assambleyası tərəfindən Uşaqların  Beynəlxalq Müdafiəsi Gününün qeyd olunması qərara alınıb. Hər bir ölkə, hər bir dövlət uşaqları qorumağı, müdafiə etməyi özünün əsas vəzifəsi hesab edir. Dünyanın əksər ölkələrində olduğu kimi bu gözəl gün Azərbaycanda da qeyd edilir.

Sonra uşaqlar haqqında aforizmlər və dahilərin gözəl fikirləri oxunub.

Tədbirdə məktəblilər “Vətən” və “1 İyun - Uşaqların Beynəlxalq Müdafiəsi Günü” mövzularında şeirlər söyləyiblər. Məktəblilərin göstərdikləri maraqlı səhnəciklər, oxuduqları mahnılar, oynadıqları müxtəlif uşaq oyunları, ifa etdikləri rəqslər tədbiri daha da rəngarəng edib.

Sinif müəllimləri Dilşad Şeyxzadə və Zümrüd Əhədi də öz çıxışları zamanı balacaları bayram münasibətilə təbrik edərək onlara ən xoş arzularını çatdırıblar.

Tədbirin sonunda balaca oxucuların Uşaqların Beynəlxalq Müdafiəsi Günü və “Gözəl Şuşa” mövzularında rəsmləri nümayiş olunub.