Məlahət Abbasova 1969-cu il 18 may tarixində Bakıda, Pirşağı qəsəbəsində anadan olub. Azərbaycan Dövlət Mədəniyyət və İncəsənət Universtitetini bitirdikdən sonra Akademik Milli Dram Teatrında 5 il çalışıb. Ailə qurduqdan sonra isə 1991-ci ildən Türkiyədə yaşayır.

Hal-hazırda İstanbul şəhər Bələdiyyə Teatrında rejissor işləyir. Türkiyədə həm aktrisa, həm rejissor, həm də bədii rəhbərin müavini kimi fəaliyyət göstərib. 2016-cı ildə İstanbul bələdiyyəsinə bağlı şəhər teatrlarının bədii rəhbərinin müavini seçilib.

O, müsahibələrinin birində belə deyib: “Sənətə təzə başlayarkən baxdım ki, bizim kitabxanada (Türkiyədə) bir dənə də olsun Azərbaycan əsəri yoxdur. Bu mənə pis təsir etdi. Mən də öz əsərlərimizi tərcümə edib tamaşaya qoydum. İlk olaraq tamaşaya Bəxtiyar Vahabzadənin “İkinci səs” əsərini qoydum. ”Təhminə və Zaur”, “Qatil”, “Şekspir” kimi əsərləri 2015-ci ildə tamaşaya qoymuşduq. 2015-ci il “Şekspir” əsərinə görə “İlin rejissoru” mükafatına layiq görüldüm. O zaman İstanbulun bələdiyyə sədri olan Rəcəb Tayyib Ərdoğan məni tanıyırdı. O mənə dedi ki, sənə ilk işini deyirəm. Azərbaycan və Türkiyə arasında “körpü” olacaqsan”.

Əməkdar incəsənət xadimi Məlahət Abbasova teatr və kinodan əlavə, seriallarda da rol alır. Aktrisa televiziya tamaşalarında yaddaqalan obrazlar yaradıb. “İmtahan” filmi (1987-ci il), “Sən həmişə mənimləsən” (1987-ci il), “Sürəyya” (1987-ci il), “Fatimə” (1988-ci il), “Bizim qəribə taleyimiz” (2005-ci il), “Acılar bitməz” filmi (2009-cu il), “Sübhün səfiri” (2012-ci il), “Mahmud və Məryəm” və başqa filmlərdə ifa etdiyi rollar özünəməxsus ifadəliliyi, bitkinliyi və plastikası ilə seçilir.

Aktrisanın qəhrəmanları müxtəlif taleli olsalar da, fərqli vəziyyətlərdə inkişaf etsələrdə, tamaşaçı onları məhz Məlahət Abbasovanın peşəkar yanaşması və daxili yaşamı sayəsində unutmur.

Məlahət Abbasova mədəni əlaqələrin inkişafında bir körpü olmaq, müştərək layihələr həyata keçirmək və bununla da qarşılıqlı inkişafa təkan vermək yönümündə də geniş fəaliyyət göstərir.

Sevimli aktrisamızı doğum günü münasibətilə təbrik edir, ortaq mədəniyyətimizin inkişafı istiqamətində fəaliyyətində yeni-yeni yaradıcılıq uğurları arzulayırıq.