Şüvəlan qəsəbə Mədəniyyət evi Qala Arxeoloji-Etnoqrafik Muzey Kompleksinə ekskursiya təşkil edib
İyulun 9-da Bakı Şəhər Mədəniyyət Baş İdarəsinin Şüvəlan qəsəbə Mədəniyyət evində fəaliyyət göstərən kurs və dərnəklərin şagirdləri valideynlərilə birlikdə Xəzər rayonunda fəaliyyət göstərən Qala Arxeoloji-Etnoqrafik Muzey Kompleksinə ekskursiya təşkil ediblər.
“Tariximiz, mədəniyyətimiz” mövzusunda təşkil olunan bu ekskursiya mədəniyyət evinin ümumi iş planına əsasən nəzərdə tutularaq həyata keçirilib. Bildirilib ki, bu abidələrin qorunması və qoruğun daha da zənginləşdirilməsi üçün 2008-ci ildə Heydər Əliyev Fondunun dəstəyi ilə burada açıq səma altında ilk Qala Arxeoloji-Etnoqrafik Muzey Kompleksi yaradılıb. Muzey kompleksi ərazisində ölkəmizə, xüsusən də Qalaya və Abşeron yarımadasına xas olan arxeoloji memarlıq abidələri toplanıb və bərpa olunub. Bu ərazidə e.ə. III-II minilliklərə aid kurqanlar, arxeoloji abidələr, həmin dövrə aid olan yaşayış məskənləri, orta əsrlərə aid yaşayış və başqa memarlıq nümunələri ilkin görünüşdə qurulub. Ekskursiya iştirakçıları 1,5 hektar ərazini əhatə edən muzey kompleksində Abşeron yarımadasının abidələri, tarixi yerləri, qeyd olunmuş xəritə, plan, sxem və yarımadaya məxsus abidlərin təsvir olunmuş stendlər, e.ə. III-II minilliyə aid qayaüstü rəsmlər, bütlər, kurqanlar, meqalitik abidələr, arxeoloji tapıntılarla zəngin Arxeoloji qalereya, orta əsrlərə aid yaşayış evlərinin konservasiya olunmuş qalıqları, qədim dulusçuluq, xalçaçılıq, dəmirçilik sənətinin nümunələri, interyeri və eksteryeri ilə öz dövrünü əks etdirən XIX əsrə aid ikimərtəbəli yaşayış evini gəzib, təsərrüfatın canlı nümunələri – qoyunçuluq, dəvəçilik, atçılıq və digər sahələrlə tanış olublar.
Muzeylə yaxından tanış olan kollektiv bu ekskursiyadan cox məmnun olduqlarını və gödükləri hər bir eksponat onlarda tariximiz və mədəniyyətimiz haqqında maraq kəsb etdiyini söyləyibər. baku-art.az
