Xalq yazıçısı İsmayıl Şıxlının 100 illik yubileyi qeyd olunub

 İyunun 3-də  Bakı Şəhər Mədəniyyət Baş İdarəsi Yasamal rayon  MKS-nin Mərkəzi Kitabxanası 173 saylı tam orta məktəblə birgəYasamal rayon Heydər Əliyev MərkəzindəXalq yazıçısı İsmayıl Şıxlının 100 illiyinə həsr olunmuş tədbir keçirib.

Tədbirdə ədibin övladları Elçin və Fərrux Şıxlınskilər, gəlini Sevinc Şıxlınskaya, məktəbin direktoru Sitarə Abbasova, müəllimlər Şərqiyyə Həsənova, Aybəniz İsgəndərova,Mərkəzi Kitabxananın əməkdaşları, oxucular, məktəblilər iştirak və çıxış ediblər.

Xatirə gecəsini Yasamal rayon MKS-nin direktoru Lətifə Məmmədova açaraq bildiribki,Azərbaycan Respublikasının Prezidenti İlham Əliyevin 28 yanvar 2019-cu il tarixli Sərəncamı ilə bu il nasir,ədəbiyyatşünas, pedaqoq və ictimai xadim, Xalq yazıçısı İsmayıl Şıxlının 100 illiyi qeyd olunur. O,İsmayıl Şıxlının yaradıcılığından qısa məlumat verib, qonaqları İ.Şıxlının xatirəsinə hazırlanmış videoçarxa baxmağa dəvət edib.

Sonra ailə üzvləri çıxış edərək yazıçı haqqında xatirələrini danışıblar.

Məktəbin direktoru Sitarə Abbasova çıxışında vurğulayıb ki, XX əsr Azərbaycan bədii nəsrinin inkişafında İsmayıl Şıxlı xarakterlər və yüksək mənəvi-əxlaqi keyfiyyətlərə malik obrazlar silsiləsi yaradıb. Ədibin məşhur “Dəli Kür” romanını ictimai şüurda dönüşə və özünüdərkə yol açan mühüm ədəbi-mədəni hadisə kimi qiymətləndirib.

Daha sonra kitabxananın əməkdaşı İradə Hüseynova qeyd edib ki, İsmayıl Şıxlının həyat və yaradıcılığına həsr olunmuş tədbirlər silsilə şəklində davam edəcək.

Tədbirin bədii hissəsində İncəsənət Gimnaziyasının şagirdlərinin ifasında mahnılar səsləndirilib,şagirdlər və kitabxanaçılar onları maraqlandıran sualları yazıçının ailə üzvlərinə veriblər.

Tədbirdə 173 saylı tam orta məktəbin şagirdi,gənc rəssam Naina Mehdipur tədbir zamanı çəkdiyi İsmayıl Şıxlının portretini ailə üzvlərinə təqdim edib.

Sonda İsmayıl Şıxlının kitablarından ibarət sərgi nümayiş olunub.