Mayın 08-də Bakı Şəhər Mədəniyyət Baş İdarəsinin  Səbail rayon MKS-nin Mərkəzi Kitabxasında Azərbaycan Respublikası  Mədəniyyət Nazirliyinin təşəbbüsü, Bakı Şəhər Mədəniyyət Baş İdarəsinin təşkilatçılığı ilə ulu öndər Heydər Əliyevin anadan olmasının 96-cı ildönümünə həsr olunmuş oxucular arasında “Oxu bayramı” müsabiqəsinin yekun turu keçirilib. 

Tədbirdə Bakı Şəhər Mədəniyyət Baş İdarəsinin baş məsləhətçisi S.Piriyeva, Səbail rayon MKS-nin direktoru N.Ələkbərova, Bakı Şəhər Mərkəzləşdirilmiş Kitabxana Sistemlərinin əməkdaşları, oxucular iştirak ediblər.

Müsabiqənin keçirilməsində məqsəd oxucular arasında mütaliə ənənələrinin təbliğ edilməsi, onların mütaliə-bilik dairəsinin genişləndirlməsi, mütaliə vərdişlərinin inkişaf etdirilməsi, kitabxanalara ictimai marağın artırılmasıdır.

Müsabiqənin yekun mərhələsinə Bakı şəhər kitabxanalarının seçimlərində fərqlənən 16  oxucu qatılıb.  Müsabiqənin Əsasnaməsinə uyğun olaraq qiymətləndirmə meyarları - oxunmuş kitabların sayı və müsabiqə iştirakçılarının mütaliə etdiyi kitablar barədə məlumatlılıq səviyyəsi nəzərə alınmaqla münsiflər heyətinin yekdil qərarı ilə qaliblər müəyyən olunub.

 Münsiflər heyətində C.Cabbarlının ev muzeyinin direktoru Q.Bağırova, Səbail rayonu 189-190 nömrəli tam orta məktəbin dil-ədəbiyyat müəllimləri T.Rzayeva və N.Məmmədova təmsil ediliblər.  

Tədbirdə Ulu Öndər Heydər Əliyevin həyat və fəaliyyətini əks etdirən kitab sərgisi və Səbail rayonu 189-190  nömrəli tam orta məktəbin 10-cu sinif şagirdlərinin hazırladıqları buktreylerlər təqdim olunub.

“Oxu bayramı” müsabiqəsi qaliblərinin təltifolunma mərasimi 2019-cu ilin may ayında Yasamal rayon Heydər Əliyev Mərkəzində həyata keçiriləcək.  Müsabiqənin I, II və III yerlərini qazanan 6 qalibin pul mükafatı ilə dəyərləndirilməsi nəzərdə tutulub. Həmçinin müsabiqənin 5 iştirakçısına həvəsləndirici mükafatlar, 5 nəfərə isə müxtəlif hədiyyələr təqdim ediləcək.