G.Şaroyev adına 35 nömrəli onbirillik musiqi məktəbinin növbəti uğuru

Mayın 3-də Bakı Şəhər Mədəniyyət Baş İdarəsi G.Şaroyev adına 35 nömrəli onbirillik musiqi məktəbinin fortepiano ixtisası üzrə V sinif şagirdi Ləman Şahin qızı Seyidova “Simurq” Musiqi festivalının finalçısı olub.

Azərbaycan və Rusiyadan olan münsiflər heyətinə Moskva Mərkəzi məktəbinin fortepiano kafedrasının müdiri Mira Marçenko, Rusiya Federasiyasının Əməkdar artisti, pianoçu Aleksandr Gindin, Beynəlxalq Muğam mərkəzinin direktoru, Azərbaycanın Xalq artisti Murad Hüseynov, Beynəlxalq müsabiqələr laureatı, “Anadolu” Türk Universitetinin müəllimi Fərid Adıgözəlzadə, BMA-nın prorektoru, Xalq artisti Yeganə Axundova və “Simurq”  Musiqi festivalının təsisçisi və lahiyə rəhbəri Səidə Tağızadə daxil idi.

2018-ci ilin oktyabr ayından başlanmış bu festivala yüzlərlə gənc pianoçular qatılıb. Aylarla keçirilən ustad dərsləri və çıxışların nəticəsi olaraq 1-2 may tarixlərində finala seçim turu keçirilib. 6 nəfər azərbaycanlı gənc pianoçudan Ayan Aslanova, Nərgiz Əliyeva, Ləman Seyidova, Nərminə İsmayılova, Elçin Məmmədov və Zərrin Şükür festivalın finalına keçərək Bakı Musiqi Akadamiyasının Böyük Zalında keçirilən Qala-konsertdə çıxış ediblər.

Qeyd edək ki, Ləman bir çox beynəlxalq müsabiqələrin laureatıdır. Hazırda bir neçə beynəlxalq müsabiqəyə dəvət alıb. Onun müəllimi Əməkdar müəllim Kamilla Əmirovadır.